أشقر علـــــ"بابا"ــــــى أشقر *_^

~السلام عليكم و رحمة الله و بركاته~

نزولا عند طلب الزوار و المقيمين هنا
سوف يكون هذا البوست ذو طابع فرايحي
و راح يتناول شخصية الوالد من جانب كوميدي

طبعا الوالد من القابه " أشقر على أشقر " أحنا نسميه بهالأسم لأنه

عيونه عسليه و رموشة و حواجبه شقر لكن شعر رأسه "الحمد لله " أسود
لو شعر أبوي أشقر جان أنا:( بس "الحمد الله " و لأنه شكلهم غريب فنسميه جذي و أهو لمن يتغشمر يوقع بهاللقب وحتى كان يبي يخلي نكه بالبلوتوث جذي بس نصحته ما يحط هاللقب و إلا راح يضايجونه البنات على الفاضي خخخخخخخ

أمي تقول و ما جذبت أمي يوم قالت:
"كل فتاة بأبيها معجبةٌ"

ما أنكر هالشي لكن لكل شي أسبابه لأنه باختصار ما في أبو مثل أبوي و لو حندبوا ولو شابوا مثل باباتي ما يابوا و الأسباب كثير على العموم لمن أكثر كلام عن أبوي أبجي لأنه إنسان بكل ما تعنيه هاذي الكلمة من معنى و رجل من زمن الرجال يمكن هالبوست ما راح يوضح الجانب اللي على أساسه أحب أبوي لكن راح يتكلم عن الجانب المرح و المضحك اللي فيه.

~أبوج عاجل~

يدتي "الله يرحمها" دايما كانت تقول لي : أبوج عاجل..بس كان ينحاش من الروضة ..و ابوج عاجل..و مرة بغى ينقطع صبع أخوه و السبب اهوه..و أبوج عاجل..و مرة متعلق بسيارة و اضطريت أركض و أركض وراه لين وقف راعي السيارة (طبعا بعد هالحادث أبوي نام و قام و براسة بقعة شيب و اهو طفل و رافقته لي الشباب و المشيب يعني الحكمة بدت مبجر ههههه) ..و أبوج عاجل..و مرات دعم بالسياير (طبعا قبل لا يأخذ الليسن) و ما اكتشفوا إلا بعدين..و أبوج عاجل..و لمن كان يحبي كنت أربط ريله بشريطه خفيفة علشان أتحرك أو أطبخ طبعا كل عمامج أقدر ألاقيهم إلا أبوج يكون واصل السكة..و أبوج عاجل..و ما خلوا بالوعة مكرم القاري ما خذوا منها زهاوية حق الحبال ..و أبوج عاجل..و بس سوى و بس سوى..و أبوج عاجل
شفيكم يا جماعة الخير أبوي عاجل و يدتي لمن تقول شي نقول سمعا و طاعة و أبوي عاجل.

~ماي الزيتون~

الله يسلمكم ..أبوي كل بين فترة و الثانية يطلع له بهبة (يعني موضة) و علاج طبيعي يعتبره دواء لكل داء و يبتدي يوصي فيه من يوم ما تعرف على زين الأتات و مريم نور و د.جميل قدسي الدويك
بس نسى الحكمة اللي تقول"عط الخباز خبزه لو كلى نصه"
لكن أبوي يرحم<<< أكيد لأ.. في مرة هب لنا بالمرة (دواء عشبي مر) و قام يذكر منافعها و طبعا كله بدون قراية و لا دراية المشكلة أنه لمن يروح الديوانية قبلها يمر على عمتي و أهي المرجع عاد خوش مرجع أي يصير خير كاااااااااااك...

و عاد أبوي بعد ما يسمع منها او من غيرها عن دوا عشبي يعتبر نفسه مخترع الدوا فيروج له و يزيد في محاسنه و أول ما يبتدي يجرب على نفسه ..و في مرة عاد قام ياخذ الزيتون اللي طلع بمزرعته و الورق ماله و قام يغليه بماي و بدا يرشه على المزرعة و لحد اللحين ما ندري شنو ناوي عليه..بعدها قام يعبي ببطولة ماي و يحطه بالثلاجة و أمي تراقب شيسوي و تضحك و فجأة عرض على أمي تشرب من محلولة السحري "يذكرني بمحبوبة بمسلسل خالتي قماشة خخخخخ" و قام يقولها هذا في علاج للمعدة و البشرة و الربو و الكحة و أمي كانت مريضه و تحت ضعفها و المرض خذت لها قلاص و أنا أقول لها لأ يما ما تدرين شنو مفعولة و لا شنو فيه لكن شربته و اقتنعت مدة يوم أنه مفيد لكن باليوم الثاني ندمت و قالت أنا الغلطانة اللي شربت هالتسبع (يعني الماي اللي تم غسل الأواني به) و بدا يوزع على خواته و ربعه و أهم مصدقين و يقول لهم يداوي العليل و يقرب البعيد و يبعد القريب (حشى سحر مو ماي زيتون) و قام يقول أنه من رشه على مزرعته ما قام أيي(يجيء) عليها حشرات (يبا تكفى مو من هالماي إلا من الحر الحشرات فطسانة ) لكن أبوي مصمم و يقولي أنت ما عندج سالفة شعرفج هههههههههه

و راح بعد عرض اختراعه على مهندسين زراعيين و المشكلة أنهم اقتنعوا و قالوا لازم نسوي زيارة حق مزرعتك المصون "اللا لو تشوفونها غابة مو مزرعة و كلها تراكيب و تجارب و دثرة" المهم يو المهندسين و قالوا فعلا ما في حشرات و قالوا له مناخ مزرعتك استوائي و طبعا الله خير الوالد فرح زود لكن المهندسين مع الوقت ما ماتت حشراتهم و هذا أول أسباب فشل المنتج لانه ما أنطبق عليه التكرار فعرفوا أنه مو ضابط إلا مع أبوي "أنا أتوقع قناعة أبوي أهي سبب نجاح المنتج على مزرعته و بس"

المــــهمـــ... بعدها على يوم و أنا قاعدة على المكتب و إلا أبوي أيي(جاء) يسولف لي عن تركيباته و يشرح جان يرن تلفونه و بدا يكلمه واحد و تلفون أبوي نوكيا يعني المكالمة كلها بأذوني جان يقوله رفيجه شفت ماي الزيتون اللي عطيتني ياه جان أبوي يفز يبي ينحاش لأنه يدري أني راح اتطنز و أنشر الخبر أنه لحد اللحين يروج حق الدواء اللي يأتي بالعلل فتبعته و اهو لمحني و قب و أنا وراه جان يقوله أبوي ...

أبوي: شوف الحين أنته مرتك من تاخذ ماي الزيتون راح تشوف تحسن بصحتها (عزة الله ذبحوا المرة )

رفيجه: صج على أيدك

أبوي: بس خلها تاخذه على الريج (أقول غرد يا دكتور بابا أي)

رفيجه: جم مرة؟؟؟ (أقعد بعد جم مرة أخاف بس)

أبوي : الصبح و بليل و عند اللزوم (لو سمحت يبا حدد)

رفيجه: قولتك ...

أبوي: أي صدقني مفيد ، انته مو تقول مرتك فيها سكري

رفيجه:أي

أبوي: كلها جم أسبوع و تقط الأبر (استغفر الله ذبحها ذبحها غطوني و صوتوا)

رفيجه:لاااااا ... صج!!!

أبوي: و يساعد على الرشاقة و ينظف الجسم و ينزل الضغط و حق الربو و الحساسية (عجيييييب يا دكتور بابا بعد يشد البشرة مو )

رفيجه: مشكور و ما قصرت أنزين عندك غيره أبي بعد و أبي حق فلان و فلان و شرايك تعطيه حق فلان ولده تعبان...

أبوي: إن شاء الله ،خلاص أيب لك على المسيان

رفيجة:مشكور و ما قصرت و مع السلامة

أبوي:مع السلامة حياك

أهو أبوي سكر التلفون جان أنا أقوله

أنا:بعد ليش الناس يروحون الطبيب كافي بطول ماي الزيتون

أبوي: ما ادري ليش يروحون ، شسوي بعد الواحد يبي الاجر

أنا : يبا أي أجر توك ذبحت المرة جدامي يبا تدري يعني شنو ابر انسولين تبي تخلي المرة تقطهم و تشرب هالماي المعفن

أبوي:لا لا خاتون ما حبيتها منج الزيتون شجرة مباركة

أنا:أي بس مو تغسلها و تاخذ مايها و تقول دوا

أبوي : شسويلج انت ما عندج سالفة

و بصراحة محد ما كلها غير الخدم أبوي ييب (يجيب)بهالورق و يقولهم غسلوه و بعدها أغلوه عاد مو أي جدور جدور العزايم مساكين طاح حيلهم عاد أمي لمن شافتهم ينشغلون عنها و كله تعبانين ودرت عن الموضوع أقفلت مشروعه و صادرت الكميات و بالبالوعة مكرم القاري عاد كان مشروع مجاني أبوي كان يبيه لوجه الله لكنه عفس الاوادم (جنه طالع من مسلسل المتقاعدين) شرايكم بأبوي خخخخخخخخخخخخخ هههههههههههه تهقون شصار بالمرة ما أبي أتصور صراحة

~ المكاسر~

(المكاسر = الطلب من البائع في تنزيل من سعر بضاعته )

أبوي طالع مع رفيجه ما أدري وين رايحين بس المهم دخلوا محل و اختاروا اللي يبون و بما أنه أبوي يحب يكون أهو دايما الرابح وبما أنه ناوي يعقد صفقه و ناوي يعلم رفيجه شلون يكاسر شوفوا شنو صار
(للي ما يعرفون العملة الكويتية ...الدينارين إلا ربع = الدينار و سبعمائة و خمسون فلس)
أبوي : رفيق هذا حبه واحد بجم ؟
(بالكويتي أي بائع هندي نسميه: رفيق- بيساب- محمد، و الحريم ممكن ينادونه "حجي" حتى لو بوذي ههههه)
البائع:أتنين دينار إلا ربووو (يعني دينارين إلا ربع)
أبوي: لا ما آخذه إلا بدينار و سبعمية و خمسين فلس
صديق الوالد:!!!!!!!!!!مصدوم
البائع : مافي مشكلة أنا قولي تو دينار إلا ربوووو
أبوي: شوف بغير السعر اللي قلته ما آخذ أنا باخذ كمية منك
البائع: خلاص جيب دينارين إلا ربووووو
صديق الوالد:!!!!!!!!!!!!!مازال مصدوم
أبوي:لاااااااا أنا قلت كلمتي تبي و إلا أمشي (أخاف بس)
البائع: يلا جيب دينار سبعمية خمسين ما في مشكلة
صديق الوالد: شفيك يقولك دينارين إلا ربع تقوله بدينا و سبعمية و خمسين شنو الفرق يعني ؟؟؟!!!!
أبوي: أوووووووووووه (يضحك)لا لا ما يبي تبي دينارو نص و إلا ما في
يبا لا تكاسر مرة ثانية فضيحة هههههههههههههههه



~باينشتاين~
أبوي المخترع...أبوي عنده عقدة اينشتاين لازم يخترع عاد آخر اختراع عند أبوي قاعد يحضر له
أهو <<<سيارة من خشب وبعد طيارة من خشب مو جنه العلم تطور و أبوي لحد الحين يبحث عن أصل الأشياء أمي تقول أنه سوى السيارة من قبل وركب فيها أمه (يعني جدتي) بس يقول مو مقتنع يبي يسوي شي متطور يبي يكون فيها بريك خخخخخخخ (أثاري الأولى دعمت و ما اقدروا يوقفونها هههههههه مسكينة يا يدتي)
و لمن مرة قعد يشرح لي عن الطيارة اللي يبي يسويها و إلا أشوفه يسوي حركة السباحة الأمامية بأيده
جان أقوله يبا متأكد أنها طيارة مو طفاحية و من يومها بالعايلة علوقة عليه (طفارة) أبو طيارة تسبح و إلا تطفح
و اللي يقوله تعال اهي طيارة و إلا مركب خخخخخخخخخخخخ
عاد أبوي ما يرد علينا و يمكن ينكت بعد ومعانا (معنا) و يختمها بجملته المعهودة"ما عندكم سالفة "
"أهو يعرف يسوي مشاريع صغيرة مثل فقاسة و أجهزة بسيطة و ما أقدر أنكر قدرته انه يتعامل مع الكهربا خاصة انه دارسها و سوا مشاريع نجحت و أهو مستشار العايلة بالسياير و التكيف و السنترال و الكهربا و البنيان بعد لكن مو على طول تضبط "

~ضايق خلقهم~

بعدسة: المدونة العزيزة "كوكتيل"

أمي و أبوي اثناء الغزو العراقي الغاشم ضايق خلقهم (يا سلام يعني الناس مستانسة )
فقرروا يتمشون (ماشاء الله ثقة)
المهم قالت أمي
أمي :ها شرايك نطلع أممممم وين نروح انا بخاطري اروح البحر (واااااااااي مو صج)
أبوي:يللا خل نتمشى ملينا من قعدة البيت(لا تعليق)
المهم طلعوا و راحوا تمشوا و يقولون مالقينا بحر فداروا بالشوارع يشوفون شنو صاير و ارجعوا البيت
يعني بصراحة عملية انتحارية
و الأدهى و الأمر ما خذيني معاهم علشان يونسوني و يطلعوني
يقولون يبون يتمشون حتى بأيام الغزو ههههه بس الله حفظنا الصراحة و إلا جان رحنا ملح (لنا عمر)

و مرة بعد خذاني ويا خالي علشان يجيلون (يعني يحضرون أغراض البيت) انزين ماخذيني و انا طفلة بريئة ليش؟؟؟

سؤال يسدح نفسه و يشوت بريله (برجله) محتاج جواب
عاد متسلطين وقتها محفظيني كل الأغاني الوطنية و أنا كان حفظي و قوي و مخارج الحروف عندي واضحة تماما عكس الأطفال ،و معلميني أسب صدام ،وكنت دايم أقول كل ما سمعت صوت صاروخ صدام خايس طقة قوية
فالجندي كان طيب بس وقفني ويا ابوي و خالي على ريولنا و قتها عمري سنة و سبع شهور على ريولي مدة ساعة (أيي يصير خير طيب) فقام خالي يتكلم وياهم عراقي و يلطف معاهم الجو علشان يسمحون لأبوي يشيلني لأنهم خايفين أتملل و أتعب و أعطي جم سبة حق صدام عاد وقتها فججها (فككها) و أهي ما تتفجج


و هذا البحر اللي شافوه و بعد يبون يتمشون هههههههه صج مزاج

~مغامر~

أتذكر مرة أبوي ياي يصعد الغاز على السلم جان يقولون له ركب لمبة للسلم محترقة لمبته جان أبوي يقول يبو لي لمبة و صعد على الغاز و بدا يركب و الكل يقوله انزل لا تطيح لأنه السلم كان عالي و مو مغطى بزل لكن منو يرد أبوي No way دايما نظام يخبص الواحد

و مرة مسافرين للسعودية جان ينتبه أنه ماشي wrong sideجان يرجع مسافة طويلة لي ورا مالا داعي أقول لكم انه كل اللي بالسيارة تشهد و أولهم عمتي حدها خوافة مسكينة و من قرادة حظها ركبت ويا أبوي
و أنا كنت نايمة و صحيت على همس تشهدها و فهمت انه أبوي مسوي عملة جان أتشهد و أطقها نومه علشان ما أحس إن عشت عشت و عن مت رايحة اعتمر و قارية الأذكار و الله المستعان

أبوي يحب يشتري اجهزة كهربائية و يجربها و يطورها المهم عاد ذاك اليوم واحد من ربعه يتكلم عن المنشار الكهربائي و أهو أصلا صديق أبوي فنان و له بهالسوالف فأبوي قرر انه يشتريه المهم شتراه و دور له شغله يسويها فيه جان يقول بسوي طاوله عاد و اهو يشتغل فيه و مع غمرة الشغل جان يجرح إيده و كان الجرح طويل و فيه عمق المهم ابوي ماله خلق ألحين يروح الطبيب و خياط و مندمج جان أييب قهوة تركية و يغطي الجرح على باله قاعد بحرب الوالد هههههههههه ...المــهــمــ... بعد ما خلص تسحب علشان محد يشوفه و يلومه و راح الطبيب جان يقوله هذا الجرح في عمق شوي و مفروض تيي أبجر لانه نشف و ما أقدر اخيطه و ظل فتره طويلة مغطي إيده لأنها كانت مكشوفه (بصراحة ما أدري شلون قدر يتحمل منظر الدم و أهو يطشر و أيده مفتوحة )

~عمارة الأرمن~

في أحد الأيام راح أبوي يتمشى مع ربعه في حولي جان يمرون على عمارة يسمونها"عمارة الأرمن" لأنه كل سكانها من الأرمن و كانوا يتجهون لها لأنه في حواليها دايما يتواجد طائر الزعرة (نوع من أنواع الطيور )
المهم قعدوا يرمون هالطيور بالنباطة (النبلة) فرما أبوي زعرة و راح ياخذ الغنيمة فنط الطوف (يظهر كانت العمارة قصيرة) و صعد السطح و إذا بالقطو خذا الزعرة و قب (هرب) فأبوي يا ينزل فشافته مرأة عجوز أرمنية جان تصرخ من باب التخويف : ولاااااا (يعني ياولد) أبوي من الخرعة قط نفسه و حس بالنزلة قوية و حس بحرارتها في ريله.. و ظل يركض و بنص الطريج ظل يحس بحرارة الضربة تزداد (وطبعا قبل عيالنا ما يتنزلون يطالعون الأرض فلازم يركضون و عيونهم فوق لأنهم ما يهتمون حق ديكورهم) المـهـمــ... طالع أبوي ريله وإلا داخله فيها قاعة بطل فسحبها و قطها و خاف أمه تشوفه في هالحالة و كله دم فتسحب لين السطح و ظل يصب عليها غاز إلين وقف الدم صج بصراحة أبوي عاجل كل هذا و مو عاجل




~هوشة Xمعركة~

قديما في الكويت الصبيان المشاغبين كانوا يآخذون أسلاك الكهربا و يسحبون منها المعدن (النحاس)و يظل المطاط اللي يغطه فيجمعونهم و يعجفونهم (يظفرونهم) فيصير بالنهاية عندهم سوط متين وقوي و الضرب فيه قاتل و يستخدمونه في المشاجرات و طق بعضهم بعض (أسم الله عليهم عيالنا كله حق أغراض علمية )
المهمـ
صكت هوشة بين عيال الفريج كلهم و بداو يتجهزون للحرب فاللي خلعوا الدشاديش(الزي الوطني الثوب الأبيض) و اللي ربطوا الدشاديش على خصورهم و اللي مسك له عقال و اللي حديدة و اللي سوط و اللي واثق من نفسه رايح بيده الفاضيه كراتيه مو هوشه
المهمـ
تقابلوا الفريقان و دبت المعركة بالفريج و الرمل طالع نازل و كل من مسك له واحد و خذ خذ خذ أيها الأحمق خذ يا سعود بوراس و وليدان القزم و صلوح الأجلح عاد أبوي كان أصغر واحد بالمعركة لكن مثل ما عرفتوا أنه أبوي مغامر و يحب المشاركة و يحب يفوز فدخل... مثل ما يقول المثل القديم"أبوي ما يقدر إلا على أمي"
فالفريق الثاني مسكوا أبوي و ربطوه بعامود و شوحوا له (حركوا أمامه)بالسوط و قالوا له صير معانا و ألسبوا الأرض(أي ضربوا الأرض بقوة)جان أبوي يقول ما أصير بحمه و زوره جان يطقونه و يقولوله ها تصير ألحين جان يقول لهم ما أصير و ظلوا صير و ما تصير و أبوي ثابت (الله يهداك بس يا يبا قول أصير و خرب عليهم مخططاتهم بس ذابحته عزة النفس و الكرامة) أهم ملوا و أبوي ما مل إلى أن جاء رجل كبير و موقر و فج أبوي من أيدهم و أبوي مصمم ما أصير ما أصير يا معود فجوك هد أعصابك ههههههههههههههههههه


~حوطة حولي~

أبوي كان يدرس في مدرسة بحولي و كان طالع من المدرسة راكب قارية و جنطته على ظهره و ماشي فوقف عند حوطه فيها يقطنون مجموعة من العمال ..المهم.. بما أنه أبوي عاجل فنباطته على طول في جنطته فسحبها و بدا يرمي الطيور اللي حوالين الحوطه و إلا فجأة يطلع له خروف من الحوطة يقول ابوي ما ادري اهو خروف ما أدري جلب من شراسته و كان ضخم حيل و عنيف و خبل فالمهم بدا يركض باتجاهه و ابوي كان منزل جنطته على الأرض جان يركب القاري و يهدها عاد انتبه له راعي الخروف و كان ريال ايراني فقال حق أبوي تعالي جنطتاج بس أبوي قال ما أبي أنت يبها عاد أشفق على أبوي و يابها له (عاد أبوي وايد مهتم و ميت على الدراسة هههههه)

~عقدة عمي~

مسكين هالعم اللي أصغر من أبوي على طول دايما مقهور و يغار من أبوي لأنه كل الناس تحب أبوي اكثر و أبوي دايما حظه حلو و أمه تحبه أكثر و طلباته أوامر و أي شي يسويه صح و هذا العم شاطر و هادي و مؤدب و جميل لكن كل صفاته الحميدة يوصفون فيها أبوي و أهو مهملينه طبعا يدتي تحب كل عيالها لكنها تغلي أبوي أكثر شي طبيعي لأنه البجر و لأنه مرح صج أهو له عمايل لكنه كريم و مطيع حيل و يحترم الكبار المــــهــــــمــــــــــــ
ذاك اليوم أبوي و يا عمي يتمشون بالفريج جان يشوف أبوي ديناموا مال سيارة مقطوط عاد المخترع أبوي إذا ما تعبث ما يرتاح جان ياخذه و يركب له أسلاك كهربا 12 فولت و يمسك عمي الأسلاك و قاله شوف أنا ألحين بروح أشب الكهربا عاد أبوي فتح البلاك مني عمي طار مناك و صوت قوي كان صوت أنفجار فالييران (الجيران) ييو يشوفون شالسالفة و عمي مصدوم و قلبه واقف و أبوي يخفي معالم الجريمة و سألوا أبوي هااا شصاير جان يقول جنه واحد مبنجر تايره(عجلات السيارة) و أنفجر هههههههههههه و من يومها عمي اللحين أكبر ما عنده عشرين سنه و أهو يخاف من الكهربا حتى مرة كانت تسولف مرته مع امي و تشكي
تقول :تصدقين ذاك اليوم قاعد يصلح جان يقولي روحي شبي البلاك جان أقوله ما تخاف علي انت قوم شبه
جان تقولها مو منه من عمايل ريلي فيه هههههههههههههههههه



~أنته كنت حرامي؟!؟~
أبوي دايما يحط في كل مكان عده من باب الإحتياط في دبه السيارة في الدرج داخل السيارة في مخباته بالدرج اللي يم راسه في دار العده اللي عنده و في الشفونيرة اللي بهول البيت و أحيانا نشك أنه حاط تحت السيراميك و الغنفات و من بين العده مفاتيح
فأمي دايما متعقدة من هالسالفة كل الناس في بمداليتهم إن كثر خمس مفاتيح أو مداليتين و بكل مدالية بالكثير ثلاث أبوي عنده أكثر من خمسه و في كل وحده أكثر من عشر مفاتيح
فأمي دايما تقوله أنت شنو بالضبط كنت حرامي و بعدين صرت ضابط و اللا شنو ؟؟؟(يعني فلم هندي مرة ضابط و مرة حرامي خخخخخ)
أبوي علمني شلون أفتح القفولة بعلاق بس ما ضبطت عدل وياي بس تعلمت منه بعض سوالف الحرامية
فهذا اللي معقد أمي لأنه يذكرها في مسرحية "مدرسة المشاغبين "بهجت الاباصيري لمن يطلع مداليته خخخخخخ

منو فيكم عاجل؟ يرفع إيده

أوووووووه جنا الوالد أول واحد رفع إيده خلاص يبا ما لا داعي ترفع

كلنا عارفين أنك عاجل *_^

مو عدل؟

نصيحة: لا تجربوا هذه الحركات في منازلكم

مع تمنياتي لكم بإجازة صيفية سعيدة و باردة ^_^