مدونة خاتون...أول مدونة تتخصص في الكوميديا الواقعية بالشرق الأوسط *_^

تمنياتي لكم بالإستمتاع هنا

الجمعة، 18 يونيو، 2010

أشقر علـــــ"بابا"ــــــى أشقر *_^

~السلام عليكم و رحمة الله و بركاته~

نزولا عند طلب الزوار و المقيمين هنا
سوف يكون هذا البوست ذو طابع فرايحي
و راح يتناول شخصية الوالد من جانب كوميدي


طبعا الوالد من القابه " أشقر على أشقر " أحنا نسميه بهالأسم لأنه


عيونه عسليه و رموشة و حواجبه شقر لكن شعر رأسه "الحمد لله " أسود
لو شعر أبوي أشقر جان أنا:( بس "الحمد الله " و لأنه شكلهم غريب فنسميه جذي و أهو لمن يتغشمر
يوقع بهاللقب وحتى كان يبي يخلي نكه بالبلوتوث جذي بس نصحته ما يحط هاللقب و إلا راح يضايجونه البنات على الفاضي خخخخخخخ


أمي تقول و ما جذبت أمي يوم قالت:
"كل فتاة بأبيها معجبةٌ"



ما أنكر هالشي لكن لكل شي أسبابه لأنه باختصار ما في أبو مثل أبوي و لو حندبوا ولو شابوا مثل باباتي ما يابوا و الأسباب كثير على العموم لمن أكثر كلام عن أبوي أبجي لأنه إنسان بكل ما تعنيه هاذي الكلمة من معنى و رجل من زمن الرجال يمكن هالبوست ما راح يوضح الجانب اللي على أساسه أحب أبوي لكن راح يتكلم عن الجانب المرح و المضحك اللي فيه.





~أبوج عاجل~

يدتي "الله يرحمها" دايما كانت تقول لي : أبوج عاجل..بس كان ينحاش من الروضة ..و ابوج عاجل..و مرة بغى ينقطع صبع أخوه و السبب اهوه..و أبوج عاجل..و مرة متعلق بسيارة و اضطريت أركض و أركض وراه لين وقف راعي السيارة (طبعا بعد هالحادث أبوي نام و قام و براسة بقعة شيب و اهو طفل و رافقته لي الشباب و المشيب يعني الحكمة بدت مبجر ههههه) ..و أبوج عاجل..و مرات دعم بالسياير (طبعا قبل لا يأخذ الليسن) و ما اكتشفوا إلا بعدين..و أبوج عاجل..و لمن كان يحبي كنت أربط ريله بشريطه خفيفة علشان أتحرك أو أطبخ طبعا كل عمامج أقدر ألاقيهم إلا أبوج يكون واصل السكة..و أبوج عاجل..و ما خلوا بالوعة مكرم القاري ما خذوا منها زهاوية حق الحبال ..و أبوج عاجل..و بس سوى و بس سوى..و أبوج عاجل
شفيكم يا جماعة الخير أبوي عاجل و يدتي لمن تقول شي نقول سمعا و طاعة و أبوي عاجل.



~ماي الزيتون~

الله يسلمكم ..أبوي كل بين فترة و الثانية يطلع له بهبة (يعني موضة) و علاج طبيعي يعتبره دواء لكل داء و يبتدي يوصي فيه من يوم ما تعرف على زين الأتات و مريم نور و د.جميل قدسي الدويك
بس نسى الحكمة اللي تقول
"عط الخباز خبزه لو كلى نصه"
لكن أبوي يرحم<<< أكيد لأ.. في مرة هب لنا بالمرة (دواء عشبي مر) و قام يذكر منافعها و طبعا كله بدون قراية و لا دراية المشكلة أنه لمن يروح الديوانية قبلها يمر على عمتي و أهي المرجع عاد خوش مرجع أي يصير خير كاااااااااااك...


و عاد أبوي بعد ما يسمع منها او من غيرها عن دوا عشبي يعتبر نفسه مخترع الدوا فيروج له و يزيد في محاسنه و أول ما يبتدي يجرب على نفسه ..و في مرة عاد قام ياخذ الزيتون اللي طلع بمزرعته و الورق ماله و قام يغليه بماي و بدا يرشه على المزرعة و لحد اللحين ما ندري شنو ناوي عليه..بعدها قام يعبي ببطولة ماي و يحطه بالثلاجة و أمي تراقب شيسوي و تضحك و فجأة عرض على أمي تشرب من محلولة السحري "يذكرني بمحبوبة بمسلسل خالتي قماشة خخخخخ" و قام يقولها هذا في علاج للمعدة و البشرة و الربو و الكحة و أمي كانت مريضه و تحت ضعفها و المرض خذت لها قلاص و أنا أقول لها لأ يما ما تدرين شنو مفعولة و لا شنو فيه لكن شربته و اقتنعت مدة يوم أنه مفيد لكن باليوم الثاني ندمت و قالت أنا الغلطانة اللي شربت هالتسبع (يعني الماي اللي تم غسل الأواني به) و بدا يوزع على خواته و ربعه و أهم مصدقين و يقول لهم يداوي العليل و يقرب البعيد و يبعد القريب (حشى سحر مو ماي زيتون) و قام يقول أنه من رشه على مزرعته ما قام أيي(يجيء) عليها حشرات (يبا تكفى مو من هالماي إلا من الحر الحشرات فطسانة ) لكن أبوي مصمم و يقولي أنت ما عندج سالفة شعرفج هههههههههه

و راح بعد عرض اختراعه على مهندسين زراعيين و المشكلة أنهم اقتنعوا و قالوا لازم نسوي زيارة حق مزرعتك المصون "اللا لو تشوفونها غابة مو مزرعة و كلها تراكيب و تجارب و دثرة" المهم يو المهندسين و قالوا فعلا ما في حشرات و قالوا له مناخ مزرعتك استوائي و طبعا الله خير الوالد فرح زود لكن المهندسين مع الوقت ما ماتت حشراتهم و هذا أول أسباب فشل المنتج لانه ما أنطبق عليه التكرار فعرفوا أنه مو ضابط إلا مع أبوي "أنا أتوقع قناعة أبوي أهي سبب نجاح المنتج على مزرعته و بس"

المــــهمـــ... بعدها على يوم و أنا قاعدة على المكتب و إلا أبوي أيي(جاء) يسولف لي عن تركيباته و يشرح جان يرن تلفونه و بدا يكلمه واحد و تلفون أبوي نوكيا يعني المكالمة كلها بأذوني جان يقوله رفيجه شفت ماي الزيتون اللي عطيتني ياه جان أبوي يفز يبي ينحاش لأنه يدري أني راح اتطنز و أنشر الخبر أنه لحد اللحين يروج حق الدواء اللي يأتي بالعلل فتبعته و اهو لمحني و قب و أنا وراه جان يقوله أبوي ...

أبوي: شوف الحين أنته مرتك من تاخذ ماي الزيتون راح تشوف تحسن بصحتها (عزة الله ذبحوا المرة )


رفيجه: صج على أيدك


أبوي: بس خلها تاخذه على الريج (أقول غرد يا دكتور بابا أي)


رفيجه: جم مرة؟؟؟ (أقعد بعد جم مرة أخاف بس)


أبوي : الصبح و بليل و عند اللزوم (لو سمحت يبا حدد)


رفيجه: قولتك ...


أبوي: أي صدقني مفيد ، انته مو تقول مرتك فيها سكري


رفيجه:أي


أبوي: كلها جم أسبوع و تقط الأبر (استغفر الله ذبحها ذبحها غطوني و صوتوا)


رفيجه:لاااااا ... صج!!!


أبوي: و يساعد على الرشاقة و ينظف الجسم و ينزل الضغط و حق الربو و الحساسية (عجيييييب يا دكتور بابا بعد يشد البشرة مو )

رفيجه: مشكور و ما قصرت أنزين عندك غيره أبي بعد و أبي حق فلان و فلان و شرايك تعطيه حق فلان ولده تعبان...


أبوي: إن شاء الله ،خلاص أيب لك على المسيان


رفيجة:مشكور و ما قصرت و مع السلامة


أبوي:مع السلامة حياك


أهو أبوي سكر التلفون جان أنا أقوله

أنا:بعد ليش الناس يروحون الطبيب كافي بطول ماي الزيتون


أبوي: ما ادري ليش يروحون ، شسوي بعد الواحد يبي الاجر


أنا : يبا أي أجر توك ذبحت المرة جدامي يبا تدري يعني شنو ابر انسولين تبي تخلي المرة تقطهم و تشرب هالماي المعفن


أبوي:لا لا خاتون ما حبيتها منج الزيتون شجرة مباركة


أنا:أي بس مو تغسلها و تاخذ مايها و تقول دوا


أبوي : شسويلج انت ما عندج سالفة


و بصراحة محد ما كلها غير الخدم أبوي ييب (يجيب)بهالورق و يقولهم غسلوه و بعدها أغلوه عاد مو أي جدور جدور العزايم مساكين طاح حيلهم عاد أمي لمن شافتهم ينشغلون عنها و كله تعبانين ودرت عن الموضوع أقفلت مشروعه و صادرت الكميات و بالبالوعة مكرم القاري عاد كان مشروع مجاني أبوي كان يبيه لوجه الله لكنه عفس الاوادم (جنه طالع من مسلسل المتقاعدين) شرايكم بأبوي خخخخخخخخخخخخخ هههههههههههه تهقون شصار بالمرة ما أبي أتصور صراحة








~ المكاسر~

(المكاسر = الطلب من البائع في تنزيل من سعر بضاعته )

أبوي طالع مع رفيجه ما أدري وين رايحين بس المهم دخلوا محل و اختاروا اللي يبون و بما أنه أبوي يحب يكون أهو دايما الرابح وبما أنه ناوي يعقد صفقه و ناوي يعلم رفيجه شلون يكاسر شوفوا شنو صار
(للي ما يعرفون العملة الكويتية ...الدينارين إلا ربع = الدينار و سبعمائة و خمسون فلس)
أبوي : رفيق هذا حبه واحد بجم ؟
(بالكويتي أي بائع هندي نسميه: رفيق- بيساب- محمد، و الحريم ممكن ينادونه "حجي" حتى لو بوذي ههههه)
البائع:أتنين دينار إلا ربووو (يعني دينارين إلا ربع)
أبوي: لا ما آخذه إلا بدينار و سبعمية و خمسين فلس
صديق الوالد:!!!!!!!!!!مصدوم
البائع : مافي مشكلة أنا قولي تو دينار إلا ربوووو
أبوي: شوف بغير السعر اللي قلته ما آخذ أنا باخذ كمية منك
البائع: خلاص جيب دينارين إلا ربووووو
صديق الوالد:!!!!!!!!!!!!!مازال مصدوم
أبوي:لاااااااا أنا قلت كلمتي تبي و إلا أمشي (أخاف بس)
البائع: يلا جيب دينار سبعمية خمسين ما في مشكلة
صديق الوالد: شفيك يقولك دينارين إلا ربع تقوله بدينا و سبعمية و خمسين شنو الفرق يعني ؟؟؟!!!!
أبوي: أوووووووووووه (يضحك)لا لا ما يبي تبي دينارو نص و إلا ما في
يبا لا تكاسر مرة ثانية فضيحة هههههههههههههههه



~باينشتاين~
أبوي المخترع...أبوي عنده عقدة اينشتاين لازم يخترع عاد آخر اختراع عند أبوي قاعد يحضر له
أهو <<<سيارة من خشب وبعد طيارة من خشب مو جنه العلم تطور و أبوي لحد الحين يبحث عن أصل الأشياء أمي تقول أنه سوى السيارة من قبل وركب فيها أمه (يعني جدتي) بس يقول مو مقتنع يبي يسوي شي متطور يبي يكون فيها بريك خخخخخخخ (أثاري الأولى دعمت و ما اقدروا يوقفونها هههههههه مسكينة يا يدتي)

و لمن مرة قعد يشرح لي عن الطيارة اللي يبي يسويها و إلا أشوفه يسوي حركة السباحة الأمامية بأيده
جان أقوله يبا متأكد أنها طيارة مو طفاحية و من يومها بالعايلة علوقة عليه (طفارة) أبو طيارة تسبح و إلا تطفح
و اللي يقوله تعال اهي طيارة و إلا مركب خخخخخخخخخخخخ
عاد أبوي ما يرد علينا و يمكن ينكت بعد ومعانا (معنا) و يختمها بجملته المعهودة"ما عندكم سالفة "
"أهو يعرف يسوي مشاريع صغيرة مثل فقاسة و أجهزة بسيطة و ما أقدر أنكر قدرته انه يتعامل مع الكهربا خاصة انه دارسها و سوا مشاريع نجحت و أهو مستشار العايلة بالسياير و التكيف و السنترال و الكهربا و البنيان بعد لكن مو على طول تضبط "





~ضايق خلقهم~





بعدسة: المدونة العزيزة "كوكتيل"

أمي و أبوي اثناء الغزو العراقي الغاشم ضايق خلقهم (يا سلام يعني الناس مستانسة )
فقرروا يتمشون (ماشاء الله ثقة)
المهم قالت أمي
أمي :ها شرايك نطلع أممممم وين نروح انا بخاطري اروح البحر (واااااااااي مو صج)
أبوي:يللا خل نتمشى ملينا من قعدة البيت(لا تعليق)
المهم طلعوا و راحوا تمشوا و يقولون مالقينا بحر فداروا بالشوارع يشوفون شنو صاير و ارجعوا البيت
يعني بصراحة عملية انتحارية
و الأدهى و الأمر ما خذيني معاهم علشان يونسوني و يطلعوني
يقولون يبون يتمشون حتى بأيام الغزو ههههه بس الله حفظنا الصراحة و إلا جان رحنا ملح
(لنا عمر)

و مرة بعد خذاني ويا خالي علشان يجيلون (يعني يحضرون أغراض البيت) انزين ماخذيني و انا طفلة بريئة ليش؟؟؟



سؤال يسدح نفسه و يشوت بريله (برجله) محتاج جواب
عاد متسلطين وقتها محفظيني كل الأغاني الوطنية و أنا كان حفظي و قوي و مخارج الحروف عندي واضحة تماما عكس الأطفال ،و معلميني أسب صدام ،وكنت دايم أقول كل ما سمعت صوت صاروخ صدام خايس طقة قوية
فالجندي كان طيب بس وقفني ويا ابوي و خالي على ريولنا و قتها عمري سنة و سبع شهور على ريولي مدة ساعة (أيي يصير خير طيب) فقام خالي يتكلم وياهم عراقي و يلطف معاهم الجو علشان يسمحون لأبوي يشيلني لأنهم خايفين أتملل و أتعب و أعطي جم سبة حق صدام عاد وقتها فججها (فككها) و أهي ما تتفجج


و هذا البحر اللي شافوه و بعد يبون يتمشون هههههههه صج مزاج





~مغامر~



أتذكر مرة أبوي ياي يصعد الغاز على السلم جان يقولون له ركب لمبة للسلم محترقة لمبته جان أبوي يقول يبو لي لمبة و صعد على الغاز و بدا يركب و الكل يقوله انزل لا تطيح لأنه السلم كان عالي و مو مغطى بزل لكن منو يرد أبوي No way دايما نظام يخبص الواحد

و مرة مسافرين للسعودية جان ينتبه أنه ماشي wrong sideجان يرجع مسافة طويلة لي ورا مالا داعي أقول لكم انه كل اللي بالسيارة تشهد و أولهم عمتي حدها خوافة مسكينة و من قرادة حظها ركبت ويا أبوي
و أنا كنت نايمة و صحيت على همس تشهدها و فهمت انه أبوي مسوي عملة جان أتشهد و أطقها نومه علشان ما أحس إن عشت عشت و عن مت رايحة اعتمر و قارية الأذكار و الله المستعان

أبوي يحب يشتري اجهزة كهربائية و يجربها و يطورها المهم عاد ذاك اليوم واحد من ربعه يتكلم عن المنشار الكهربائي و أهو أصلا صديق أبوي فنان و له بهالسوالف فأبوي قرر انه يشتريه المهم شتراه و دور له شغله يسويها فيه جان يقول بسوي طاوله عاد و اهو يشتغل فيه و مع غمرة الشغل جان يجرح إيده و كان الجرح طويل و فيه عمق المهم ابوي ماله خلق ألحين يروح الطبيب و خياط و مندمج جان أييب قهوة تركية و يغطي الجرح على باله قاعد بحرب الوالد هههههههههه ...المــهــمــ... بعد ما خلص تسحب علشان محد يشوفه و يلومه و راح الطبيب جان يقوله هذا الجرح في عمق شوي و مفروض تيي أبجر لانه نشف و ما أقدر اخيطه و ظل فتره طويلة مغطي إيده لأنها كانت مكشوفه (بصراحة ما أدري شلون قدر يتحمل منظر الدم و أهو يطشر و أيده مفتوحة )






~عمارة الأرمن~



في أحد الأيام راح أبوي يتمشى مع ربعه في حولي جان يمرون على عمارة يسمونها"عمارة الأرمن" لأنه كل سكانها من الأرمن و كانوا يتجهون لها لأنه في حواليها دايما يتواجد طائر الزعرة (نوع من أنواع الطيور )
المهم قعدوا يرمون هالطيور بالنباطة (النبلة) فرما أبوي زعرة و راح ياخذ الغنيمة فنط الطوف (يظهر كانت العمارة قصيرة) و صعد السطح و إذا بالقطو خذا الزعرة و قب (هرب) فأبوي يا ينزل فشافته مرأة عجوز أرمنية جان تصرخ من باب التخويف : ولاااااا (يعني ياولد) أبوي من الخرعة قط نفسه و حس بالنزلة قوية و حس بحرارتها في ريله.. و ظل يركض و بنص الطريج ظل يحس بحرارة الضربة تزداد (وطبعا قبل عيالنا ما يتنزلون يطالعون الأرض فلازم يركضون و عيونهم فوق لأنهم ما يهتمون حق ديكورهم) المـهـمــ... طالع أبوي ريله وإلا داخله فيها قاعة بطل فسحبها و قطها و خاف أمه تشوفه في هالحالة و كله دم فتسحب لين السطح و ظل يصب عليها غاز إلين وقف الدم صج بصراحة أبوي عاجل كل هذا و مو عاجل




~هوشة Xمعركة~




قديما في الكويت الصبيان المشاغبين كانوا يآخذون أسلاك الكهربا و يسحبون منها المعدن (النحاس)و يظل المطاط اللي يغطه فيجمعونهم و يعجفونهم (يظفرونهم) فيصير بالنهاية عندهم سوط متين وقوي و الضرب فيه قاتل و يستخدمونه في المشاجرات و طق بعضهم بعض (أسم الله عليهم عيالنا كله حق أغراض علمية )
المهمـ
صكت هوشة بين عيال الفريج كلهم و بداو يتجهزون للحرب فاللي خلعوا الدشاديش(الزي الوطني الثوب الأبيض) و اللي ربطوا الدشاديش على خصورهم و اللي مسك له عقال و اللي حديدة و اللي سوط و اللي واثق من نفسه رايح بيده الفاضيه كراتيه مو هوشه
المهمـ
تقابلوا الفريقان و دبت المعركة بالفريج و الرمل طالع نازل و كل من مسك له واحد و خذ خذ خذ أيها الأحمق خذ يا سعود بوراس و وليدان القزم و صلوح الأجلح عاد أبوي كان أصغر واحد بالمعركة لكن مثل ما عرفتوا أنه أبوي مغامر و يحب المشاركة و يحب يفوز فدخل... مثل ما يقول المثل القديم"أبوي ما يقدر إلا على أمي"
فالفريق الثاني مسكوا أبوي و ربطوه بعامود و شوحوا له (حركوا أمامه)بالسوط و قالوا له صير معانا و ألسبوا الأرض(أي ضربوا الأرض بقوة)جان أبوي يقول ما أصير بحمه و زوره جان يطقونه و يقولوله ها تصير ألحين جان يقول لهم ما أصير و ظلوا صير و ما تصير و أبوي ثابت (الله يهداك بس يا يبا قول أصير و خرب عليهم مخططاتهم بس ذابحته عزة النفس و الكرامة) أهم ملوا و أبوي ما مل إلى أن جاء رجل كبير و موقر و فج أبوي من أيدهم و أبوي مصمم ما أصير ما أصير يا معود فجوك هد أعصابك
ههههههههههههههههههه


~حوطة حولي~




أبوي كان يدرس في مدرسة بحولي و كان طالع من المدرسة راكب قارية و جنطته على ظهره و ماشي فوقف عند حوطه فيها يقطنون مجموعة من العمال ..المهم.. بما أنه أبوي عاجل فنباطته على طول في جنطته فسحبها و بدا يرمي الطيور اللي حوالين الحوطه و إلا فجأة يطلع له خروف من الحوطة يقول ابوي ما ادري اهو خروف ما أدري جلب من شراسته و كان ضخم حيل و عنيف و خبل فالمهم بدا يركض باتجاهه و ابوي كان منزل جنطته على الأرض جان يركب القاري و يهدها عاد انتبه له راعي الخروف و كان ريال ايراني فقال حق أبوي تعالي جنطتاج بس أبوي قال ما أبي أنت يبها عاد أشفق على أبوي و يابها له (عاد أبوي وايد مهتم و ميت على الدراسة هههههه)






~عقدة عمي~



مسكين هالعم اللي أصغر من أبوي على طول دايما مقهور و يغار من أبوي لأنه كل الناس تحب أبوي اكثر و أبوي دايما حظه حلو و أمه تحبه أكثر و طلباته أوامر و أي شي يسويه صح و هذا العم شاطر و هادي و مؤدب و جميل لكن كل صفاته الحميدة يوصفون فيها أبوي و أهو مهملينه طبعا يدتي تحب كل عيالها لكنها تغلي أبوي أكثر شي طبيعي لأنه البجر و لأنه مرح صج أهو له عمايل لكنه كريم و مطيع حيل و يحترم الكبار المــــهــــــمــــــــــــ
ذاك اليوم أبوي و يا عمي يتمشون بالفريج جان يشوف أبوي ديناموا مال سيارة مقطوط عاد المخترع أبوي إذا ما تعبث ما يرتاح جان ياخذه و يركب له أسلاك كهربا 12 فولت و يمسك عمي الأسلاك و قاله شوف أنا ألحين بروح أشب الكهربا عاد أبوي فتح البلاك مني عمي طار مناك و صوت قوي كان صوت أنفجار فالييران (الجيران) ييو يشوفون شالسالفة و عمي مصدوم و قلبه واقف و أبوي يخفي معالم الجريمة و سألوا أبوي هااا شصاير جان يقول جنه واحد مبنجر تايره(عجلات السيارة) و أنفجر هههههههههههه و من يومها عمي اللحين أكبر ما عنده عشرين سنه و أهو يخاف من الكهربا حتى مرة كانت تسولف مرته مع امي و تشكي
تقول :تصدقين ذاك اليوم قاعد يصلح جان يقولي روحي شبي البلاك جان أقوله ما تخاف علي انت قوم شبه
جان تقولها مو منه من عمايل ريلي فيه هههههههههههههههههه




~أنته كنت حرامي؟!؟~
أبوي دايما يحط في كل مكان عده من باب الإحتياط في دبه السيارة في الدرج داخل السيارة في مخباته بالدرج اللي يم راسه في دار العده اللي عنده و في الشفونيرة اللي بهول البيت و أحيانا نشك أنه حاط تحت السيراميك و الغنفات و من بين العده مفاتيح
فأمي دايما متعقدة من هالسالفة كل الناس في بمداليتهم إن كثر خمس مفاتيح أو مداليتين و بكل مدالية بالكثير ثلاث أبوي عنده أكثر من خمسه و في كل وحده أكثر من عشر مفاتيح
فأمي دايما تقوله أنت شنو بالضبط كنت حرامي و بعدين صرت ضابط و اللا شنو ؟؟؟(يعني فلم هندي مرة ضابط و مرة حرامي خخخخخ)
أبوي علمني شلون أفتح القفولة بعلاق بس ما ضبطت عدل وياي بس تعلمت منه بعض سوالف الحرامية
فهذا اللي معقد أمي لأنه يذكرها في مسرحية "مدرسة المشاغبين "بهجت الاباصيري لمن يطلع مداليته خخخخخخ

منو فيكم عاجل؟ يرفع إيده


أوووووووه جنا الوالد أول واحد رفع إيده خلاص يبا ما لا داعي ترفع


كلنا عارفين أنك عاجل *_^

مو عدل؟


نصيحة: لا تجربوا هذه الحركات في منازلكم

مع تمنياتي لكم بإجازة صيفية سعيدة و باردة ^_^

هناك 52 تعليقًا:

  1. ماشاالله وااايد عاجل ;))

    الله يحفظه صج ونيس ماشاالله وينحب :)

    بس عمج كسر خاطري هههه اتخيله طار من الكهربا مسكين ماينلام اذا تعقد الحين

    الله يحفظه الوالد ويخليه لكم يارب :)

    ردحذف
  2. الله عيبني البوست، و غريب ماجد شفت حد منزل عن أبووه .. بس إسمحيلي ما كملته، بكمله باجر فيه رقاااااااد فظيع .. و أحس حلو البوست يباله تركيز و سوالف غاويه .. إنشاء الله باجر بكمله..
    و الله يطول بعمر الأشقر ياااااارب ..

    ردحذف
  3. نمله النموله19 يونيو، 2010 1:12 ص

    نعيما
    مليت وانا انطر
    ترى ما قريت بس لقافه
    بلا اقرى وارد اعلق

    ردحذف
  4. نمله النموله19 يونيو، 2010 1:33 ص

    خاتون الله يسلمج
    ابوج قاعد يسوي اختراعات علميه <<<فراغ التقاعد
    وتصدقين عاد خل يروح لدكاترتكم يمكن يعطونه ماستر
    اهم يبون الشغيلين :)

    ..
    يمكن على يوم يسير بيتكم مختبر
    هههههههههههههههههههههه

    ...
    ابوج عااااااااااااااااجل
    :)

    ردحذف
  5. to grow old and wise you must be first wild and crazy! ;p
    أنا متأكدة من ان حياة والدكم حفظه الله مليئة بالخبرة والتجارب.
    أتستمتعت لدرجة ما أدري أعلّق على أي سالفه فيهم.
    عسى الله يطوّل لكم بعمره ولا يحرمكم منه :")

    وبخصوص "كل فتاة بأبيها معجبة"
    ما أقدر أوافقج أكثر ; )

    ردحذف
  6. صباح الخيرات :)

    صباحك سعيد غاليتي مثل بوست السعيد المضحك جدا اللي ونسنا جزاك الله خير :)

    ماشاء الله أبوك كوميدي :)

    فعلا ضحكت وايد وأنا أقرأ البوست كسر خاطري عمك المسكين تذكرت توم أن جيري يوم يتكهرب توم :)

    فصلت على المكالمة مالت الدواء أبداع ما أدري ليش أهلنا يسون جذي عندنا وعندك خير :)

    لا والمكاسر إبداع
    ولا أسير الحرب كسر خاطري حرام الريال مؤمن بقضيته وجماعته :)

    حيل البوست يضحك وجميل كعادتك عزيزتي
    وأنا أقول إنت طالعه على منو في الكوميديا :)

    الله يحفظه إن شاء الله ويخليه لكم اللهم أمين

    وشكرا عزيزتي على وضع الصورة اللي تشرفت أنها صارت بمدونة مميزة مثلك

    بس الحق ينقال حييييييييييييييييييييل عاجل :)


    شكرا على وصلة الضحك الجميل وأحلى شيء أني خذيتها في الصباح :)

    ردحذف
  7. خخخ البوست عجيب وممتع ماشاءالله ..

    شي حلو افتحت يومي فيه خصوصا انه عندي موعد طبيب ومتصروعه خخخ..

    الله يخليلج ابوج ويطول بعمره يارب..

    الاغنيه لو حندبوا ولو شابوا مثل باباتي ما يابوا حسبالي تاليف امي توني سالتها قالت سامعتها من منيره يا مسلسل او وحده تعرفها خخ (ماسالتها)وتغنيها لولد اخوي..

    خخ جان عنده خلطات جماليه ترا مستعده اصير فارة تجارب عنده بس بليز غير ماي الزيتون المبارك :)

    وعلى المكاسر مره امي تقولي عن وحده بتاخذ ماعون الريال يقولها بدينا اهي تقول له غير دينار ونص ماخذه :\

    وي وعليه حسروا فيج بالازمه انا حزتها طبعا اكبر منج بسنتين تقريبا فكانوا اهلي مبتلشين فيني اطلع اغني وطن الكويت وارقص بالشارع خخخ..

    بالمغامر وعمارة الارمن واي حسيت بايع عمره..

    اما بالهوشه فعجبني موقفه ماخون بربعه خخخ..

    والخروف ابوج يبيها من الله ياكل جنطته خخ..

    اما عمج وامج فعقدهم ابوج ديري بالج :)

    ومشكوره ع البوست الونيس..

    بانتظار ابداعاتج :)

    ردحذف
  8. دردشة لذيذة .. وما نختلف عنها كتير .. أسمر على أسمر!!

    ردحذف
  9. هههههههههههههههههههههههههههههههههههههههههههههههههههههههههههههههههههههههههههه

    و الله أبوووج ماشاء الله عليه عجـــيب و جو و فنان ماشاء الله عليه الله يحفظه لكم يارب..

    ما ألووم أمج إذا يتها هبه عن سوالف الماكروبيوتيك لووول من أبووج و مزرعته .. بس صدق ماشاء الله عليه الله يحفظه لكم يارب ..

    ردحذف
  10. السلام عليكم ورحمة الله وبركاته
    تسلم ايدك ^^ الله يخليلكم الوالد و يطول بعمره ^^ شخصيته حلوة و مرحة ^^ واهم شئ مخترع عظيم ^^ ما حدا فيكم طالعله!!!؟؟ ^^ بالنسبة للزيتون انا قرأت مرة انه علاج للسكري بس ما بعرف مصداقيتها يمكن حدا من يالي اعطاهم ابوكِ الدوا كاتبها ^^ههه و عندي تنبيه الدكتور جميل قدسي الدويك صحححي الترتيب ^^ مسكين عمك معه حق والله ^^ السيارة ,,,البحر,,, العمارة,,, الخروف ,,, المفاتيح ,,, الكهربا ,,, كلها مواقف عجيبة و مرحة ,,, مودتي بوست رائع

    ردحذف
  11. ماشاء الله مواقف كثيرة جمعتيها هنا
    هههههه لقد عشت بين هذه المواقف لحظات جميلة.
    شكرا لك
    حفظ الله لك والدكِ

    ردحذف
  12. هههههههههههههههههه ابوك يشابه لاابوي كثير بس ابوي يحب بعد الرسم حتى ورا كرتون الفاين يرسم على اي شي خخخخخ الله يحفظهم لنا يارب ابوك مرح وروحه حلوه وطيبه..

    موضوعك اليوم جنااان انا بعد احب ابوي كثير فعلا كل فتاة بابيها معجبه ..

    الله يوفقك حبيبتي خاتون ويسعدك بالدارين .

    ردحذف
  13. صوت القطوة *_^19 يونيو، 2010 9:59 م

    ههههههههههههههههههههههههههههههه
    ما شاء الله عليه عاااااااااااااجل

    احلى شي عاقبوج بالغزو ( شماته )
    وعليه وقفوج على ريولج بالحر ههههههههههههههههههه
    الحمد لله بس انج ما قلتي شي بس

    اشوفج باجر ان شاء الله *_^

    ردحذف
  14. ههههههههههههههههههههههههه
    خاتون مشتاقه لج حدي حدي حدي :)
    انتي اكسجيني ما اقدر لازم أطل على مدونتج
    ولا ضاق خلقي اقرا بوستاتج القديمه
    =) ياربي ماينمل منج عسل على عسل

    وابوج عجيييييييييبه اختراعاته
    والله مت من الضحك .. اهم شيء المكاسر جنه جدتي
    :) قالها راعي المواعييّن الفناجيل بنص
    قالت ليش تجذب جيرانا ماخذينه منك بـ 750 ؟
    يعني مكاسرته لوووووول ..

    و سالفة السيارة الخشب ههههههههههههههههههه
    االعالم وصلت للذورة و والوالد للحين مصر
    على خشّب زين يسير نعبي فيها بنازين:P


    و
    الماي المبارك ههههههههههه ابوج حده نفس نظام ابوي
    الا والله جاني فضول المره شصارلها ؟؟اتوقع سارت سوبر ومن :)


    الله يحفظه لكم جنه ابوي
    شكل ابوج مواليد اخر الـ خمسينات
    فيه خصل موجوده في أبوي
    الله يسلمج
    جته هبه الوالد بعد نفس السالفة متقاعد.. اخترع له عصير غير شكل !
    يقول صحي " برتقال و فصه ثوم و شوية بصل "
    :) اعصرهم بالآلة و قفشه من الثوم و قفشة بصل
    و قلاص برتقال :P خخخخخخخ الوالد يبي يرد
    ايام شبابه , وغرامه الزيتون ,
    و التفنن بالادوية وسألي وجدان
    عن ايام الرعب :) بعد الغدا يشربنا دوا فيه فيتامين ابوي شاريه على كيفه كيفه
    طعمه مرررر مرررر اتوقع
    جريب من ماي زيت الزيتون مال ابوج >- الله يا الجذبه قويه :)

    ولاتشوفين بعد الغدا نتطشر انا واخواني
    الي تحت الغتفه والي فوق السطح
    وانا عاد وحياتي الصبيانية ايام الطفولة
    اطلع للبراحة الي جدام بيتنا و اسولف مع القطاوة
    اي ياحلو القطاوة مدام السالفة فيها دواء ابوي !



    خاتون :)
    فديتج الله اعلم بغالج حدي حدي ارتاح بمدونتج .. ^^

    ردحذف
  15. الله يحفظ لج أبوج يارب ويطول بعمره. دايمًا نلاحظ إن البنت تتعلق بأبوها والولد يتعلق بأمه، يمكن فيه نوع من التضاد في هالشي.

    عجبتني وايد سوالف أبوج الشيطانية وماشالله عليه كان وااايد عاجل وبزود بعد..

    موقف الغزو حيل ضحكني اي والله انكتب لهم عمر الحمدلله، تذكرت موقف لي بالغزو لما كان عمري وقتها سنتين، مرة كنت مريض وكانوا أبوي وأمي مطلعيني بيودوني بيت عمتي لأن عندها أدوية المهم وقفونا جنود وكانوا بيذبحون أبوي وأمي وأنا. لكن جندي ثاني قالهم خلاص خلوهم ومشونا والحمدلله انكتب لنا عمر يديد..

    تسلمين ع البوست الأكثر من رائع..

    ردحذف
  16. كل فتاة معجبة بأبوها

    اي والله واني هم اشوووف بابا غير شكل :P

    اقول عندي سؤال ... هو أبوج عراقي؟؟ جنتي بالعراق لو شنو ؟؟؟ >>>> دخت :p

    والقصص مرررررة حلوة ضحكتني وونستني كلش


    بس شنو يعني كلمة عاجل ؟؟

    ردحذف
  17. BookMark ...
    مشكورة على الدعوة الحلوة
    و صج عمي مسكين ما زال يعاني
    و عسى الله يحبب فيج خلقه
    و حياج الرحمن عزيزتي *_^

    ردحذف
  18. AM.SA.CHANNEL ...
    أنت اللي رمستج غاوية>>>شلوني معاج ضابطةالدرس هههه
    اهو مزحوم شوي
    و حي الله من زارنا *_^

    ردحذف
  19. نملة النمولة...
    الله ينعم عليج ترى علشان خاطرج عجلت *_^
    تصدقين يقدر يلعب على دكاترتنا أصلا المهندسين توني أكتشفت كانوا قاعدين يسون دراسات على نزرعته و صوروها ...والوالد الحبيب طالب براءة اختراع ههههههههههه
    تصدقين عاد قال حق أمي أبي وحدة من قاعات الاستقبال بسويها معمل طبعا قوبل الطلب بالرفض جان باجر يشتكون الفريج من الازعاج كااااااااااااااك
    و للامانة أبوي عاجل
    حياج الرحمن يا وخيتي*_^ههههه

    ردحذف
  20. Seema*...
    تصدقين قريت حكمتج حق أمي جان تقول صاجة معاها حق أبوج عنده حكمة كبيرة و تصرف بالأمور
    و الحمد الله يوم ونسناج و عسى اللة يونسج بالإيمان
    أي و الله عسى اللحفظ لنا ابهاتنا و يبارك بأعمارهم
    حياج الرحمن عزيزتي *_^

    ردحذف
  21. كوكتيل...
    يسعد مسااااج و يا مساء الخيرات و البركات
    إي و الله أبوي يعرف شلون يضحك الواحد محد يقدر يزعل عليه
    عاد أبوي ما قصر مو بس بخووه مسوي حركة الكهربة حتى بنفسه ههههه

    حتى أبوج جذي عيل أنا سعيدة أبوي طلع مو بروحة في هذا العالم دكتور شعبي
    عاد إن شاء الله يكون دمي خفيف صج و ما ألوع جبودكم
    صورتج محلية الموضوع أصلا
    و على قولتج الوالد عاجل
    و حياج الرحمن عزيزتي *_^

    ردحذف
  22. رورو الشخبوطة ...
    سلامات سلامات إن شاء الله ما يكون فيج إلا العافية
    مشكورة على الدعوة و لك مثلها
    تصدقين خرعتيني لما قريت الأسم نفس أسم اللي قايلتها هههههههههه
    الله يسلمج عنده خلطات جمالية بس اللي صج تنفع و مجربة و ضبطت بينهم نقوعة المرة لمن تصير لزجه تنحط على الوي تروح الحبوب وتنشفهم بس بعد ما تغسلين ويهج لازم ترطبينه *_^
    وعلية أمج مركزة على النص فصادها هههههه
    أثاريج طلعتي مقاومة و منشورات سمعية ههههههههه
    تصدقين ذكرتيني بواقف يديدة
    العفو يا عسل
    و حياج الرحمن *_^

    ردحذف
  23. أم الخلود...
    عسى الله يحلي أيامج
    و حياج الرحمن عزيزتي *_^

    ردحذف
  24. AM.SA.CHANNEL ...
    مرحبا الساع و بعد هالساع بعد *_^
    أي و الله أهو فنان بسوالفه
    و تسلمين على الدعوة الحلوة و لج مثلها
    و حياج الرحمن عزيزتي *_^

    ردحذف
  25. الآء العساف...
    و عليكم السلام و رحمة الله و بركاته
    من ذوقج حبيبتي إمبلا طالعين عليه كلنا علمي و لا أحد فينا قسم أدبي يعني طالعين له و لنا ابتكارات بسيطة مو إختراعات ههههههههههه عندي نظريات بيلوجية و سايكلوجية في طور التطوير و البحث
    يقال أن الأفكار تنتقل عبر الإثير لأنها طاقة يمكن أبوي كان قاعد جنب عالم و قتبس الفكرة ههههه
    و المشكلة بالأسم أني خذيته من الوالدة و اهي دائما تعكس الأسماء ههههههه
    ازالة هموم اليوم عنكم و تسليتكم هي هدفنا *_^
    الروعة هي في وجودك هنا حياكِ الرحمن عزيزتي ^_^

    ردحذف
  26. أبو حسام الدين...
    و إن شاء الله يأتي دور حسام الدين
    في يوم يكتب لنا عنك شوي
    هدفناهو منحك شي من المرح و الضحك البريء
    العفو و تسلم على الدعوة الطيبة
    و حياك الرحمن استاذنا الفاضل
    ^_^

    ردحذف
  27. رندا الجنوبية...
    عن جد حتى أبوي يرسم على علب الكلينكس و يرسم أشياء غريبة و احيانا قوارب و نخل و مزهريات او شي يشبه الوحوش المضحكة ههههههههههه
    أي و الله عسى الله يحفظهم لنا
    مدام عجب متألقة مثلك أنا راضية و إن شاء الله ما تكون مجاملة
    و تسلمين على الدعوة الحلوة
    اللي مثل راعيتها و لك مثلها يا رب
    و حياج الرحمن عزيزتي *_^

    ردحذف
  28. رورو الشخبوطة ...
    توني فتحت ايميلي لقيت صوت القطوة دازتلي فوائد المرة منها:
    1.مضاد حيوي طبيعي.
    2.مهدئ للإلتهابات.
    3.يساعد على إلتئام الجروح.
    4.يقوم بإزالة التجاعيدمن البشرة ويجعلها
    بيضاء ملساء وتزيل حب الشباب وتشد البشرة كذلك.
    في بعد بس جنه كافي *_^ خلاص بفتح عطار ما ادري حواي

    ردحذف
  29. ههههه
    يسلمك ربي
    تدوينة روعة

    وعسى الله يخلي لكم الوالد ويطول بعمره

    الود كله

    ردحذف
  30. صوت القطوة...
    أكيد عاجل
    أصلا ما عاقبوني أنا أحب أوقف>>>والف يهال P؛

    من قال حر شدراج كنتي ويانا خخخخخخ
    لا ذاك اليوم ما لي خلق أتكلم كنت
    برجع البيت بنام ههههههه
    و مثل ما عاقبوني و أنت تشمتي تحملي ما أييج
    في مقالب على نار و لازم يتطبقون على أحد هههاهههاي

    حياج الله حبابة كل يوم*_^

    ردحذف
  31. صوت القطوه *_^22 يونيو، 2010 11:43 م

    تقولين في مقالب على النار ها
    الله يستر بس المشكله انا الي مجابلتج طول الدوام رأفي بحالي شوي انا مسكينه بريئة

    و على طاري حبابه ترقبي حبابه راح اسرد قصص ايمن عشماوي و اخيرا و بحاول اني استعير اسلوبه في الروايه علشان لا اخرب الاحداث
    ترقبي
    *_^

    ردحذف
  32. نبراس ...
    تشتاق لج العافية يا بعد جبدي
    وي يا بختي لمن الحلوين يدخلون مدونتي

    يا حلوها يدتج أنسانة ثابته على رايها و يا جبل ما يهزك ريح

    يقولج أبوي بعد ما سألته قال يعبونها كهربا يعني تشتغل على البطارية و يقولج لا تعبونها ماي ترى تغرق ههههههههههههههه


    أي سوبر ومن أتوقع سدحوها بالمستشفى و إلا سبحت ريلها بالبطل و شكت فيه يبي يذبحها و يتزوج عليها لووووووووووووووول


    أي أبوي مواليده آخر الخمسينات يبتيها رايت الله يسلمج أبوي مواليد 59
    الله يسلمج قلت للوالد عن عصير أبوج و جنه ياز الله
    الله يستر ... لا و عجبته سالفة انه يجبركم و يحس طافته الفكرة ما يقدر علينا ألحين
    مت من الضحك على وضعكم و أتخيل لووووووووووووووووووول

    أنا اللي فديتج و فديت كلمن يحبج
    و يا الله حيها و صدر لج و العتب لنا

    و عسى الله يونسج بالايمان و طاعة الرحمن
    ^_^حياج حبي ^_^

    ردحذف
  33. قلم ومسّاحة ...
    تسلم و يحفظ لك الوالد و الوالده ان شاء الله
    صح دايما يقولون أن البنت تتعلق بأبوها لكن أنا أكثر وحده متعلقه بأبوي خواتي و وايد من اللي أعرفهم بس مع امهم و يستحون حتى من ابهاتهم جنهم غرب

    أبوي عاجل حد الدوسه ما في لا قبل و لا بعد هدوءه

    الحمد الله على السلامة على قولت يدتي كلن له رزق بيآخذه

    حياك الرحمن و شكرا على الثناء

    ردحذف
  34. قطرة وفا ...
    عسى الله يحفظ لج أبوج

    لا أبوي مو عراقي بس بيه عرج *_^
    لا كنا بالكويت أيام الغزو

    و نسج الله بالايمان و طاعة الرحمن
    الحمج الله يوم استانستي

    كلمة عاجل=مؤدب+هادئ
    و حياج الرحمن دووم*_^

    ردحذف
  35. الغدوف...
    الرائع هو معرفة أنك أبتسمت و استمتعت هنا
    و عسى الله يجزيج الخير على الدعوه الحلوة
    و لك مثلها
    و حياج الرحمن عزيزتي
    و الود موصول لج ايضا *_^

    ردحذف
  36. الأخت الفاضلة :: خاتون ::
    أسعد الله أمسياتك وأيامك بكل خير

    ^^)

    سررت وأضحكني الموضوع ..

    وأحسن شي مكاسر الوالد :)

    الله يحفظ لك الوالد ( أشقر على أشقر )


    أطيب الأمنيات

    ردحذف
  37. محمد سعد القويري...
    و أسعد الله دنياك و آخرتك
    الحمد لله أنك سررت فإدخال
    السرور على المؤمنين نعمة
    جوزيت خيرا على الدعوة الطيبة
    و حياك الرحمن دوما أخي الفاضل
    ^_^

    ردحذف
  38. صوت القطوة ...
    أي فيه و على نار هادية لا تحاتين
    و بانتظار الدرر العشماوية *_^
    و تصير أحلى لمن تكتبينها *_^

    ردحذف
  39. هههه الله يخلي لك الوالد انشاء الله ويطول بعمره يارب
    كنت اتوقع اني عاجل بس ابوك صراحه لازم يعطي دورة
    اسمها " كيف تكون عاجل "

    عندي لك واجب ...

    ردحذف
  40. بسم الله الرحمن الرحيم


    هههههههههههههههههههه ماشاء الله تبارك الله أبوك فلة

    الله يخليه لكم يارب

    ردحذف
  41. عايزين الولايات المتحدة الإسلامية تقوم لازم نودود لبعضنا عشان تقوم ..

    ودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)

    لازم تتودوادو بها (اشتغلوا وسبحوا بها .. صبح وليل .. ليل وصبح .. داخله خارجه .. خارجه داخله) وانشروها.

    ردحذف
  42. السلام عليكم ورحمة الله و بركاته
    مراحب بالحلوين و ألف مرحوبة للخاتونة
    بس مو نفس مراحب أبلتي صباح الخيييييييييييييير و شدة على الراء.
    العيون عسلي و الحواجب شقر و الشعر أسود و فيه شيب
    صاير أبوي تايقر على آخر عمره (tiger)يماشي الموضة ياحليله
    بس الصراحة الصراحة ابوي عاجل....:)
    نعم تمت تجربة ماي الزيتون و اعطى هذه النتجية التالية:
    (يداوي العليل و يقرب البعيد و يبعد القريب)إي و الله و إنتي الصاجة سحر
    (ماكو ترش على المسكون و يطلع الجني إي موخو ماي مقري)هاذي الفايدة
    التي لم تذكر لمحاسن ماي الزيتون.و الياي أعظم.

    أما الجو الإستوائي من عذر من ترشرش ماي الزيتون رطب الجو...
    عند اللزوم متى يعني لما المرة يوقف قلبها بالضبط.
    جنج أقنعتيني لما قلتي يساعد على الرشاقة شكلي بروح أشرب بطل.
    أمي الله يهديها صايرة بلدية بالبيت ما تخلي مشروع يوقف على ريوله.

    انا زعلانة عاد جذي ما ياخذوني اتمشى معاهم على البحر.إهي إهي إهي :(
    انا ما أذكر سالفة السفرة (الحمد لله و الشكر دايما فاقدة).
    واي قطيعة هل الصبيان مافيا و أبوي مجاهد في فلسطين.
    واي يا حلو الخروف ولا بعد أشقر على أشقر وين أبوي عنه.
    أما الكهبره (الكهربة)لا تعليق أنا إلي إمعقدني شيء واحد كل العمايل السابقة
    لبابا و عمي مازال يطاوعه؟

    أنا أنا أنا أنا عاجلة.خخخخخ

    "مع تمنياتي لكم بإجازة صيفية سعيدة و باردة ^_^"
    صيفية سعيدة أوكي تدخل المخ لكن باردة ما أظن...
    وه وه وه لاهوب حر .

    ردحذف
  43. الله يخليلكم الوالد ويطول بعمره

    يعطيج العافية حبيبتي على هالبوست الممتع

    ردحذف
  44. يا حلوج خاتون
    ونستيني والله بهالبوست

    يعطيج العافيه وعسى الله يخلي الوالد لج
    ويحفظه لكم يارب

    ردحذف
  45. بوست يونس الصراحة ..الله يحفظ لج ابوج ان شالله ^^

    ردحذف
  46. السيف...
    إن شاء الله بقول للوالد عن الفكرة
    و أتوقع انه راح يرحب فيها

    جار الاضطلاع على الواجب
    حياك الرحمن

    ردحذف
  47. البرنسيسة ريماس...
    تسلمين حبيبتي و جزاج الله خير
    على هالدعوة الحلوة
    و حياج الحمن عزيزتي ^_^

    ردحذف
  48. أم الخلود ...
    ممكن شرح أكثر لهذه الحملة بحثت عن التفاصيل بمدون كركر و لم اجد لانه المدونة الأخرى لا تفتح معي
    ممكن إيميلك
    و شكرا ^_^

    ردحذف
  49. جنجر ...
    و عليكم السلام ورحمة الله و بركاته
    يا هلا بالمهلي و المهلي ما يولي
    مراحب *_^

    هيييييو لا تتحرشين في بابا أهو حلو بكل الألوان
    أكيدين بابا عاجل

    أي سفر ؟؟؟

    أي أبوي باسه قوي

    ههههههههههههههههههههههههههههههه
    تفاؤلوا يا جنجر بالخير تجدوه انا من قلت جذي و حرارة الصيف خفت هههههههههه
    سلملم *_^

    ردحذف
  50. Amwaj ...
    تسلمين على الدعوة الحلوة
    الله يعافيج يا رب
    حياج الرحمن عزيزتي ^_^

    ردحذف
  51. Ƒiona H. Al- Ƨharekh...
    يا حلو يياتج حبيبتي
    عسى الله يونسج بالإيمان و طاعة الرحمن
    الله يعافيج و تسلمين على الدعوة

    حياج اللحمن عزيزتي *_^

    ردحذف
  52. ~أم حرّوبي~ ...
    ونسج الله بالايمان و طاعة الرحمن
    تسلمين على الدعوة
    و حياج الرحمن عزيزتي ^_^

    ردحذف

حياكمـ،،،