مدونة خاتون...أول مدونة تتخصص في الكوميديا الواقعية بالشرق الأوسط *_^

تمنياتي لكم بالإستمتاع هنا

السبت، 5 يونيو، 2010

*ْ*ْ* السلطانة خاتون *ْ*ْ*





...السلام عليكم و رحمة الله ة بركاته...
اليوم أنا السلطانة خاتون



أخيرا راح أحل هالواجب المعلق *_^
شرايكم بتاجي أمانة مو حلو



قوانين التاج السلطاني :


اذكر اسم من طلب منك حل الواجب
حبايب قلبي

رندا الجنوبية
رورو الشخبوطة
الغدوف
Fishah

ممتنه جدا لذوقكم و لطفكم في اختياري


تحدث عن ستة اسرار لا يكشفها من يقابلك اول مره


(1)
اللي يشوفوني من أول مرة يقولون شالبنت الذربة و الثقيلة بس بشوشة بعدين يكتشفون أني مرحة وايد و مينونة
وايد ناس قالوا لي لمن عرفناج انصدمنا لأني بالبداية دايما ساكتة و اراقب أنتقي و ما أضحك و انكت مع الكل بس تبسم

(2)
أحلل شخصيات هالنقطة ما أكشف عنها للي حوالي بسهولة علشان عوار الراس
بس للقراب و دايما احاول اخفي و هالشي وايد متعبني و رفيجاتي و أمي فاضحيني
(3)
أحرك عيوني وايد و اسوي تعبيرات بويهي نفس الرسوم المتحركة
و لمن أنصدم أشرع عيني شوي وايد و رفيجاتي يقولون تخوفين لمن تسوين جذي
أقووول جبح :d
(4)
أعصابي باردة حد الدوسة لكن اتق شر الحليم و هالشر نادر جدا
و ما أيي إلا بعد سنين بكل ما تعنيه كلمة سنين من معنى

(5)
مهوسة قراءة و كتب و أفضل الدينية و تطوير الذات أو قصص النجاح
أحيانا أفتتح أربع كتب و أظل أقرى من الأربع كتب بشهر و أقرى من الكتب بنفس اليوم
في ناس يقولون لي هذا غلط و تشويش بس ما أقدر كلهم يشوقون

( 6)

وايد ناس بعد ما يقعدون معاي يقولون فيج شي يبجي وايد أسمع هالكلمة شنو فلم هندي قاعدة جبالكم
زين الزاد تقولي عيونج تبجيني و صوت القطوة ما ادري نمولة تقولي صوتج
بصراحة أنا أقعد مع نفسي أكثر وحدة و ما أشوف فيني شي يبجي
يمكن له علاقة بحبي الجنوني للسمبوسة


اهدي هالواجب حق :
سمو الأميرة
Fiona H. Al _ Sharekh
HeRmOsO
محمد سعد القويري
أبو حسام الدين
قلم و مساحة
شرايكم فيني عادلة 50 % 50%
و بما أني سلطانة فالعدل أساس الملك
في وايد صبايا كنت أبي أهديهم التاج لكن في ناس سبقوني و أهدوهم
و هذا التاج مهدى لكل رواد المدونة
و إن شاء الله ما أكون لوعة جبودكم ... و شكرا
~*~ و دربكم جوري ~*~

هناك 36 تعليقًا:

  1. أأأأأأأأأأأأول مره أصير أول رد ؛)


    كل الأسرار أعرفهم عنج ماعدا سر فيج شي يبجي لوووووووووووول هههههههههههههههه
    شلون ؟

    حلو التااج عجبني حلو ماشالله ^__^


    ****عجبني الشعر الارتجالي اللي على صوب
    لوووووووووووول ههههههههههه


    وجدان

    ردحذف
  2. تسلمين على وضع إسمي بالقائمة. ثاني شي الي فهمته من تحليل الشخصيات، قصدج مثلا تعرفين الشخص من جلسته وحركاته لما يكون جدامج؟ لأني مولع بهذا الشي واقدر أحلل شخصية أي واحد من عيونه وأقدر أطلع منه أشياء وأشياء بدون لا يتكلم. أما الي يقولون إن فيج شي يبجي أكيد قصدهم عيونج " حزينة "

    ويعطيج العافية على الصراحة..

    ردحذف
  3. تدرين صوتك يبكي ذكرتيني بفنان صوته مره لمن اسمعه ابكي واحس انه يبكي
    ومن ناحية مجنونة مجنونة وخفيفة دم الله يحفظك
    مشكوووره خاتونة على اختيار ك لي ^^

    ردحذف
  4. طلعتي تبجين الاوادم خخخ..

    ال2 صح من واقع تجربه خخخ..

    ال 5 المهم انتي تقدرين تفهيمنهم كلهم وماياثر عليج ماشاءالله وعن نفسي احس ماله شغل لانه كل كتاب له طابع الخاص ولا جان المدرسه مادرسون 6000 ماده مره وحده..

    مرسو سنيورته..

    ردحذف
  5. "أحرك عيوني وايد و اسوي تعبيرات بويهي نفس الرسوم المتحركة
    و لمن أنصدم أشرع عيني شوي وايد و رفيجاتي يقولون تخوفين لمن تسوين جذي "

    هذا يفسر الينون المفاجيء! ;P
    <3

    ردحذف
  6. الخاتون يعني المرأة العظيمة وكمان سلطانة والله روعة .. تحياتي لك على هذه الأسرار الرائعة ودمتي بخير

    ردحذف
  7. السلام عليكم و رحمة الله و بركاته
    يا عيني شكرا للتاج أدري إني ملكة جمال بس ما كان لازم يعني تحطين هالتاج عشاني واي أحس نفسي محرجة شكرا شكرا لكل إلي وقفوا معي خلال هذه التجربة الصعبة...............و يطول الحديث نفس مسابقات ملكات الجمال ما توافقين الرأي خاتونة بأن لما يفوزون يبدون يشكرون كل الناس الوالد و الوالدة أول شيء طبعا و يختمونها بكومار سواقها و الدودة إلي خرعتها و خلتها تقوم من النوم مبجر و يستمر هذا 10 ساعات و لما تلفين على الجمور ما تسمعين غير zzzzzzzzzzz
    سوري طشيت شوي عن الموضوع...
    أما صج أول ماشفتج و طلعت على الدنيا فقلت:(آآآآآآآآآآه)و فجأة صمت لأرى فتاة تداعبني و تقول(ديا بو)و إلي ضحكني إنا طفلة تداعب طفلة يعني إعتفس نفوخي .
    أهم شيء تحليل الشخصية تقول فاضحيني و إهيا أول وحدة فاضحة عمرها الآن كل الناس تعلم و مفيش ميخبي
    أما التعبيرات فهي تصادفني كثيرا في الصباح الباكر و لا لما تيي تقعدني حق صلاة الفجر تيي بويهي و تقول قومي و مشرعة عيونها صج فلم رعب و لكني أتمالك نفسي خوفا من ظهور تعبيرات أجود(أعظم)
    و في الختام مع السلامة و في حفظ الله ^_^

    ردحذف
  8. السلام عليكم ورحمة الله و بركاته
    صفاتك حلوة اختي خاتون ^_^ السر رقم 5 انا متلك بحب اقرأ كتب كتير و نفس المجالات تقريباً و النقطة الاهم انه بحب اقرأ من اكتر من كتاب بنف اليوم و برأي مو غلط لأنه بتركز على موضوع معين في الكتاب مو مركز على الكتاب ككل ^_^ على فكرة كنت حابه احول التاج الك بس لما دخلت مدونتك أخد الرابط أكتشفت انه محولك من قبل و حطيت شخص تاني ^_^مودتي

    ردحذف
  9. خاتون عجبني رقم 3 ههههههههه احب اشوف ردات فعل وويوه جذي :))

    والله يبعد عنا البجي .. مو هينه والله حضورج طاغي يبجي هههههههه

    ردحذف
  10. وجدان...
    سلام مربع للجدعان في كل مكان سلام مربع*_^
    اي انا بعد وياج بس من ايام الثنوي و انا اسمع هالشي مع اني كله اتبسم و نادر مكشرة
    اشوه يوم انه التاج اعجبج منقيته نقوة هذا من اغلى التيجان بالعالم هههههه
    و الشعر مو انا كاتبته بس عجبني
    و يسلم لي المرور الحلو اللي نفس راعيته
    حياج الله و بياج
    ^_^

    ردحذف
  11. قلم و مساحة...
    الله يعافيك
    لا من ملامح الوي و اسلوب الكلام
    و حتى حركات الجسم بس اهم شي الملامح
    و حياك الله
    ^_^

    ردحذف
  12. HeRmOsO ...

    هههههههههههه انا دايما لمن اشوف احد يبجي على شي بالتلفزيون و الا اغنية يحوشني ضحك هستيري من باب الشماته هههههههههههه
    صج يعني انا خفيفة دم روحي يا جميلة ربنا يجبر بخطرك
    عاج قبل كنت ناشفة ما اضحك و لا ابتسم الا بالزور و مشتهات ^_^

    ردحذف
  13. رورو الشخبوطة...
    شفتي شلون
    انا مو قلت لج لا تقولين لأحد سر خخخخخ
    اي و الله صاجة بعدين انا قمت الخص الكتب فاراجع القديم وافهم الطبخه

    يو آر سو ويلكم *_^

    ردحذف
  14. Seema*...
    و منكم نستقي اعذب الجنون و اكثره فنا
    حياج الرحمن
    نورت الصفحة ^_^

    ردحذف
  15. أم الخلود...
    الرائعة هي انت و الجمال في حضورك
    و أخلد الله ذكرك صديقتي الراقية
    ^_^

    ردحذف
  16. جنجر...
    و عليكم السلام و رحمة الله و بركاته
    جم مرة اقولج تركي لا تكثرين حلا و تدخلين مخج يسكر
    لحظة stop منو قايل حق مدرسته اختي تحلل شخصيات و يايبتلي نص المدرسة تحلل آخر شي يايبت لي ولي أمر يبي يحلل لوووووووووووول و الريال شايب شيبي بشخصيته بس عجبتني روحة المتفائلة
    أنا أخرع يا مفعوصة هذا و انا مريقتج اليوم لو ادري ما ريقتج خخخخخخخخخخ
    No more kind sweet Sister
    مدام اخرع كليوم بخزج هههههاقول مو حاصل هههههه

    ردحذف
  17. آلاء العساف...
    شكرا على الدعم و اعتبري التاج وصل اشكر ذوقج
    مرورك يزيد مدونتي جمال و رقي
    حياك الرحمن
    *_^

    ردحذف
  18. Fisha...
    تصدقين انا احب اشوف بعد الويوه و احب اللوحات التعبيرية
    عيل شلون عيل اعجبج فلم مو خاتون خخخخخخ *_^

    و حياج الرحمن و هناج بالايمان
    ^_^

    ردحذف
  19. ثاانكس حبيبتي ع التااج


    أسرااارج واايد حلوة و غريبة
    لوول
    خاصةً السر ال3 و الأخير
    و اتفق معااج في السر الرابع
    لووول

    أما أنا فواجبي لازال معلق
    نظرا لظروف النت اللي يستعبط
    ولابي العبيط
    وثاانكس ألووت مره ثاانيه ع التااج

    ردحذف
  20. صوت القطوه6 يونيو، 2010 6:18 م

    اهلا خاتون
    خاتون يعني ما في اسرار ثانية حساااافه كلهم عارفتهم لووووووووووووووول

    بس ويهج صج ترى يصير غريب لين تنصدمين تصيرين رسوم متحركه مو خاتون من شذي استانس عليج ( خبرج محبه الرسوم المتحركه )

    و انا ما اشوف صوتج يخرع بس اذا بحلقتي و اصريتي تعرفين شنو في تخرعين ما ادري احس انج بتسوين بعدها شي شرير على هالنظرات

    *_^ اشوفج على خير ان شاء الله

    ردحذف
  21. نمله النموله7 يونيو، 2010 12:04 ص

    i missed u
    i miss u
    i will miss u

    شوقتيني اقرق باشياء عنج بس مافدر اكتب ( قريبا ان شالله )
    ..
    رفيق عمري الاجملا
    قلبي وروحي اجمعا
    انت لي اسطورة
    انت احلى ما مضى

    ردحذف
  22. سمو الأميرهـ ..ツ...
    يو آر ولكم تستاهلين
    شلون جكيتي رقم 4 امممم !

    بانتظار الحل و النت احيانا يتدلع يبي
    يحسسنا انه الحياة من دونه سكالاكاتكا
    يو آر سو ويلكم و بانتظار اشوف التاج عليج ^_^

    ردحذف
  23. صوت القطوة...
    هاذي مو اسرار بس هاذي للي يشوفني أول مرة و أنتي خللتي و حمضتي الصور وياي يعني قديمة و راحت عليج اصلن لو ما تعرفين واحد منهم فيعني مو ماي كلوز فريند
    صوتي و الا عيوني انحولت و الا اي لبسي النظارة
    خخخخخ لا مو شرير بس خايف اجك افكارج هههههاههههاي
    انا اصلن اعرف الشر او ادل له طريج انا بس مشاكسة حبتين هههههههههه
    اشتقت للقرقة وياج و الحراق تحت الشمس الحنانية *_^

    ردحذف
  24. السلام عليكم.

    أختي خاتون عذرا والله عذرا لم أنتبه أنك وجهت لي التاج لأن في وقتها كنت مشغولا بإعداد التاج الذي وجهته لي الأخت الآء...
    لم أكتشف ذلك إلا الأن.
    بوركت أختي، وصفاتك مميزة، خاصة أن اعصابك باردة.
    بالتوفيق.

    ردحذف
  25. نملة النمولة...
    I miss U more
    اليوم كنت بدق عليج و انشغلت
    وايد فاقدتج يا بعد جبدي
    واي كل هذا حقي ما اقدر اصدق
    و اخيرا نونو قررتي تبوحين بمشاعرج حقي
    اللحين صدقتي لمن اقولج انج تموتين علي *_^
    Me 2
    i luv u i miss u sweet heart
    My days without u are so empty

    ردحذف
  26. أبو حسام الدين...
    حياك الله و بياك
    المهم انك أجبت هذا هو المطلوب
    المميز هو حضورك الراقي
    وبالتوفيق للجميع
    ^_^

    ردحذف
  27. الأخت الفاضلة :: خاتون ::
    صباح الخيرات والمسرات ...
    ما شاء الله عليكِ ..
    صفات جميلة رائعة .. حريٌّ بنا أن نتصف بها ..
    أن تألفي وتؤلفي .. خلقٌ أغبطك عليه ..

    دمتِ بود ومحبة وطاعة

    ـــــــــــــ
    وأقدم اعتذاري عن التاج :) ولكِ الشكر على إهدائك ،، سعدتُ بذلك

    ردحذف
  28. شخصيتك حلوة ومحبوبة
    ومرحة
    يعجبني من يحمل هذه المميزات
    ربي يحفظك يا غلا

    وفي سالفة قراءة أكثر من كتاب في نفس الوقت
    عندي نفس الحالة
    بالعكس ما في تشتيت وكل كتاب له وقته في اليوم

    سعدت بأن أطلعتينا على جوانب منك
    فعرفناك وأحببناك أكثر

    كل الورد لك

    ردحذف
  29. تحللين شخصيات وماتعلمين أحد زين تسوين لأن صج حق عوار الراس، الناس من تسمع ان في احد يحلل شخصيات على طول يسألوون فيه كل يوم جنه شخصيتهم بتتغير كل يوم ^_^

    بس هم أطالبج تحللين شخصيتي ;))

    فيج شي يبجي .. حلو حق الي يبي يفضفض ;)

    ردحذف
  30. محمد سعد القويري...
    مرحبا بك استاذي الفاضل
    اعتذاركم مقبول لأنه التاج متطفل شوي
    و حياك الرحمن دوما
    احترامي و تقديري ~*~

    ردحذف
  31. الغدوف...
    أتمنى أكون عند حسن ظنج
    و مثل ما تظنين فيني
    الكتب ألذ من الأكل و كل
    كتاب نكهة و يا حلات خبصتهم
    لك مني حبا و ودا كودي للورد طائفي ~*~
    *_^

    ردحذف
  32. BookMark ...
    اي و الله عوار راس احيانا ايوني ناس يبون تحليل شخصيات أكثر من عشرين وحدة في نفس القعدة مو آدمية مكينة ههههههههههه
    و على سالفة كل يوم يبتيها رايت شكلج تعرفين ناس يحللون و شاكين لج
    صح أهم ما يلاحظون يبجون لمن يكونون يفضفضون لأني أسكت و اتفاعل من قلب فيتأثرون و يغرقون المكان ههههههههه
    و ما شاء الله عليج عندج تبحر و عمق في النظرة و استقراء سريع للمحيط و الاحداث
    حياج الله عزيزتي بوووك يو آر سو ويلكم هير *_^

    ردحذف
  33. أختي خاتون أيتها السلطانة، لقد وضعت جوابا لإستفسارك في مدونتي، رجاءا إطلعي عليه، ولك كل التقدير والإحترام.

    ردحذف
  34. أبو حسام الدين...
    شكرا على الإجابة تم الاضطلاع
    مشكور و ما قصرت ^_^

    ردحذف
  35. اهداء الى جنجر


    http://www.youtube.com/watch?v=jULMngz_ID0&feature=related


    :) صحيح ما قلتي ...:)
    بس انتي مو فصله كثري



    زين الزاد

    ردحذف
  36. زين الزاد...
    هلا بالطيب الغالي عزيز و حضرته منوة
    تراج دوم على بالي أنت و ضحكتج الحلوة

    و هل يجاريك أحد بخفة الدم و محبة الناس ما أتوقع
    و العين ما تعلى على الحاجب يا ريس
    *_^

    ردحذف

حياكمـ،،،