مدونة خاتون...أول مدونة تتخصص في الكوميديا الواقعية بالشرق الأوسط *_^

تمنياتي لكم بالإستمتاع هنا

الثلاثاء، 30 يونيو 2009

~*بدايات مستجدة في جامعة الكويت2*~


~*بدايات مستجدة في جامعة الكويت*~

طبعا كلنا نعرف زين الانسانة اللطيفة اللي مواقفها ما تترقع و أصلا إذا كان للمواقف مصنع فزين أهي مؤسسة المصنع ..

وكل بوست ينزل راح يأكد لكمـ أنها ما في ثنتين ...

أهداء لزين ..

أنت(تحفه )صاغها الرحمن من أحلى التحف و أسمك رباعي الحروف *_^


قصة~(2)~

تروي" زين الزاد" حكايتها ...
قائلة: طال عمرجـ لبسنا كشخنا و طلعنا...(تذكرون أول ما نزلت الجناط الذهبية و الفلاتات بالكويت فترت 2006 )المهمـ زيون كانت لابستهم و تلت عبايتها و مشت ...وصلت صالة التسجيل مع والدتها أحساس رهيب غريب متضارب يجول في نفسها فرحة رهبة خوف تحفز عشرتعش شعور في شعور مسيطر عليها ... تلقتها و حده من البنات و اهي نفسها البشوشة اللي بالقصة الأولى (ما شاء الله وين ما نروح نلاقيها)
و سألت زين الزاد :وين إن شاء الله راح تسجلين حبيبتي
زين الزاد:طب إن شاء الله
قالت البشوشة(باستغراب): ما في إلا علوم اليوم للعلمي~ ككلية علمية ~ انزين جمـ معدلج بالقدرات
زين الزاد:60
هنا عاد ~ ردت الماما ~
أمـ زين الزاد: شنو علوم بنتي طب و لا شيء غير الطب
البشوشة : خالتي ما يصير !
الأمـ: مالنا شغل طب البنت ما تبي إلا طب شلون يعني
البشوشة : معدلج بامتحان القدرا60% ما ينفع!!!
البنت البشوشة علــــــــــــوم ...زين الزاد و أمها طــــــب ~طول الطريج~ أشكالهمـ نكته *_^
وصلت زين الزاد و أمها لباب صالت القبول و التسجيل اللي بالعمادة في شويخ
طبعا دخلوووو دعوووم للصالة لكن الحارس منعهم و قال: الطالبه يا حجة تدخل بروحها هزا مايصير
و طبعا هالكلام ما عجب أم
زين فقالت: ما أبي بدخل بنتي صغيرة و ما تعرف شي
و همـ يا(جاء)والد بنت ثانية و ضغطوا على الحارس فنادى الحارس وحدة من المنظمات و الموظفات علشان يتصرفون
فطلعت الموظفة و تصرخ و
قالت :شفيكم خلو بنات ترى صارو حريم كبار خل يعتمدون على نفسهم
و طبعا لأنها كويتية سمعوا كلامها خو أحنا هني ما نعترف بالنظام ...لووووول ...لازم بالكلام ياللا نرتاح أهمـ شي نحاول نتمرد إن ضبط ضبط و إن ما ضبط أحنا ننضبط...
*المهمـ زين ما كان عاجبها الوضع و كانت جدا معترضة (الحمد الله مادخلت طب و لا جان انحرمنا من شوفتها "مصائب قوم عند قوم فوائدهم"*_^ )...و طبعا كانت رغبات زيون كالتالي:(1. مركز العلوم الطبية - 2.هندسة - 3.علوم رياضية -4.علوم ادرية -
5.علوم بيلوجية )...لكن القبول طلع علوم بيلوجية و كانت هنا الخيرة بإذن الله ... طبعا زين الزاد ما كانت تعرف أصلا شنو كلية علوم على بالها بس في طب و هندسة (فلمـ مصري..أنا يا بابا عاوزة أطلع دكتورة لأنه مفيش غير الشغلانه دي في الكون..لووول:)لا و على بالها علوم يعني تطبيقي (إنه الجهل)...طبعا أبوها بشرها و بدوا بنات القوائم يتواصلون معها و يساعدونها طبعا البنات اللي كانوا يدقون شكلهم يدقون و أهم مستحين بس زين الزاد الله وكيلكم ما تخليهم إلا لما تنشف ريجهم(هيهيهيهي مساكين)..و من ضمن هالبانت تعرفت على وحده طلقة بالكلام تونس فقامت زيون تسألها... شوفوا اللحين عاد أسالت المستجدات اللي تفشل
زين الزاد : بغيت أسألج سؤال مهم أنتوا تيبون مقلمة (ركزوا على المهم)
البنت: لا شحقا !!!
(للايضاح:بس أحيانا نشيل بس حق أشياء بسيطة )
زين :و لا جنطة مدرسة؟؟!
البنت:أكيد لأ!!!
زين :بس أنتوا شغلكم وايد شلون تشيلونه(باللوكرات يا عسل)
البنت:طبعا ميته ضحك

(شفيج زين في شي اسمه جنطة كبيرة حطي كتبج فيها...مسكينة زين طالبة مدرسة مجتهدة و عليمية )
لكن أمها حست أنه بنتها مو عاجبها فراحت الأميري و قدمتلها على بعثة طبعا أقبلوها دراسة طب بأمريكا لكنها آثرت البقاء بالديرة قريبا من أهلها و ناسها و ربعها اللي يحبونها (أنا *_^)...
باجر أول يوم كلية ... الله دوام صجي مو تنويري :)... طبعا زين طول الليل تتقلب و تفكر الله وناسة شنو راح يصير باجر و شلون الوضع وشنو بيصير ؟...
~ياليتج يا زين الزاد ما سألتي هالسؤال طلع عليج أغلى من بيع السوق :( شنو بيصير هــا أخذي هذا اللي بيصير ...

أول يوم: كشخت.. دخلت..و اهي داخلة دقت عليها وحدة كانت تغار منها من أيام الثانوي فقعدت تسأل فيها و هي تمشي و تكلمها بالموبايل و متجهة لاستراحت البنات بمبنى 3خ المهمـ و لا لنا من الشيطان طريج كملت البنت طريجها و اهي تسولف ما وعت إلا وتحس أنظار متجهة عليها و بقوة لفتويهها(وجهها) و أهي ما زالت تسولف بالموبايل و لا شباب بدو بس يبين عليهم محترمين و العجيب أنهم يخزونها و أهي صاعدة للسلم و يأشرون لها وين رايحة ..المهم أهي قامت تتحلطم و تقول بصوت واطي :صج جلت (قلت)حيا ..
المهم أهي ما ردت عليهم وما عطتهم وي(أي طاف) و كملت طريجها للإستراحة و لا تشوف الطوفه زجاج شبه شفاف يعني شغل عدل
و أفتحت الباب و لا جنها "دوانية بالصباحية"(صدمــــــة) بس لحظة ليش مسوينها مطارح طبعا المطارح كانت بيج باهته و الزولية زرقة سماوية أو رمادية أكل عليها الدهر و شرب (باختصار معفنة)و في لعبة شطرنج و فجأة ولا تسمع ضحك شباب .. طلعت الحلوة زيوون داخلة ستراحةالشباب ..جان تصرخ زيوووون و قالت :يمـــــــــــااا... (حشى شايفة وحوووش)طبعا حسوا أنها مضيعة و قاموا يضحكون و أهي منصدمة و تغطي ويها و أهي خانقتها العبرة ...>>>فلمـ هندي:نهي بيا هزا موكف(موقف) مافي جين كولش
يا شماتت أبلة ضاضة لا و لما أنزلت و الا الشباب اللي كانوا يأشرون لها و اهي على السلم تحت ميتين ضحك و شمتانين لأنها كانت مهزئتهم و أخير شي أهي اللي تهزئت...لووووول
*حكمت اليوم:و هاذي جزات اللي يسأل يا ترى شنو بيصير ..تدخلين استراحة الشباب دعووووم هذا اللي يصير و تتعرضين للضحك لوووول*

موقف آخر لزين الزاد في الأيام الأولى بالكلية :
طبعا هما كاشخة زيوون كعادتها لابسة جوتي رمادي أنيق و جنطة رمادية (تمت طرارتها من أختها لزووم الأناقة)و عباية كسرات أول ما هبت..و تمشي على أحد سلالم كلية الهندسة (الجارة) بنت أبوها و هي كلها ثقة و استعداد للحياة الجامعية طامحة بتحقيق الأحلام التي تراودها تلك الساعة و إلا "بـــــوووم جــــــــــك" و طاحت زين على ويها و "يا كشخة ما تمت "
ما تسوى عليها :(
و إلا الشيلــــــــة بصـــــــوب و الكتــــــــــــب بصــــــــوب و الجنطــــــــــة بصــــــوب و الجوتـــــي السندرلي (مكرم القاري)بصــــــوب الحين شتسوي تلقط أدواتها عن الطريج و لا تغطي وياها و تنحاش..المهم زيوون أتخذت طريقة الشجاعان و واجهت الموقف و قامت هندمت حالها و ظلت تلبق أدواتها و طبعا في واحد ما يعرف يشوف و يمشي لازم يبين أنه أنا ترى شفتج و أنتي تطيحين فقعد يضحك عليها و أهي مع كل ضحكة تزيد درجة الحرارة عندها "مسكينة" و نسبة الاحمرار بالوجه تزيد..و بعد فترة أهي هسترت و أضحكت على نفسها ما تسوى عليها هالمسجينه مرة ثانية طالعي طريجج لا تشمتين العذال فيج.
*هذا كل ما لدينا اليوم و ترقبوا اليديد الأكثر إضحاكا ...و أضحك الله سنكمـ و فرح قلبكمـ و كفاكمـ شر المستجدات و آتاكمـ خيرهم*
انتظروني مراسلتكمـ "خاتون" من قلب الحدث
لا تباعدون ترى هنا تلاقون زيوون*_^

هناك 7 تعليقات:

  1. لااااااااااااااااااااااااااااااااااااا

    زين الزاد


    ما هذا

    ردحذف
  2. زين سويتي انج فصلتي كل قصة بروح علشان نقدر نرجع لها ان بخاطرنا نضحك و ان ما اسعفتنا الذاكرة نرجع للمدونه العزيزة الي تفضح مواقف البنات و على قوله زين الزا
    لا يوقف لا يوقف لا يوقف

    ردحذف
  3. شكرا على الدعم في قرار الفصل خبرج أنا ما أحب الإختلاط و ضده لووول (شكو ) المهمـ حياج الله بكل وقت و لا حرمنا ضحكاتكم العزيزة على قلبي

    و أنا بعد وياكمـ "لا يوقف لا يوقف لا يوقف"

    ردحذف
  4. وحدة عاجبتها المواقف المضحكة.
    السلام عليكم ورحمة الله وبركاته
    أولا صج هذا إلي قريتيه الله لا يقوله لا لي ولا إلغيري
    وعليا خنت عيني هالزن الزاد .
    ماعليج حبيبتي ترى المواقف هاذي إتصير حق كل الناس
    تبي مثال مثل ذيج البنية إلي...............
    إي وكانت...........
    لا أكيدة راح أتذكر..............
    آسفة بس شكلج إنا إنتي الوحيدة إلي ممكن إتصير لها مثل هالمواقف ههههههههههههه

    يلا سوي مواقف وايد عشان أضحك كااااااااك^_^
    وشكرا ودوم مواقف مضحكة آمين ترى هاذي دعوة مو دعوة على .
    أوكي حبيبتي يلا مع السلالمة إبحفظ الله إن شاء الله

    ردحذف
  5. حياج الله "وحدة عاجبتها المواقف المضحكة" أعرفج؟؟؟
    اي صج ...فعلا لازم الواحد يستعيذ من هالمواقف
    هاذي مو أنا أنا خاتون بس المبتليه و الفقيرةإلى الله اللي مو مترقعه أهي "زين الزاد"
    لا تحاتين قروبنا ما يقصر بالمواقف
    ~*حياج*~

    ردحذف
  6. ياحليلها زيون "سميتي" أثبتت انها متميزة عن البقية وتركت بصمة من أول يوم لها بالجامعة :)

    ردحذف
  7. غير معرف...
    يظهر أني أعرفج لما تشوفيني بالجامعه قولي لي *_^
    زيوووون حق المواقف المحرجة دايماً بالشوفه
    و سلامتكمـ ^_^

    ردحذف

حياكمـ،،،