~السلام عليكم ورحمة الله وبركاته~
شلونكمـ؟.. وشلون فصل الشتاء معاكمـ؟..
أتمنى أن تكونوا بخير ومحاطين بدفء أحبابكمـ
موضوع اليوم
" خالي مساعد "
اليوم بقول لكم عنه شوية سوالف وحجيات
الله يسلمكم خل ناخذ نبذة عنه مقدما
خالي مساعد... رجل في غاية الذكاء درس لغايةالمتوسط وفي كل سنينه لم يكن فقط متفوق ولم يكن فقط الأول على فصله بل كان الأول على مرحلته كلها لغاية أن أخرجه جدي من المدرسة لأن العقلية السائدة قديما أنه لكي يصبح رجل يجب أن يترك المدرسة (في ناس في زمنه درسوا بجامعات لكن قليل) وكأن الدراسة تعوق الرجولة وهذا الفكر البسيط كان سائد بالكويت في ذلك الوقت...طبعا ولاءه لجدته أم أمه أكثر من أمه لأنها أهي اللي ربته بسبب مرض جدتي(أمه) بعد ولادته وعاش طفولته وصباه وشبابه وكهولته عند جدته وكان يزور والديه وأخوته كأبن عم أو خال وليس كفرد من الأسرة
يحب القراءة لي درجة أنه كان عنده طاولة اعجبتني واكتشفت بعد فترة أنها عبارة عن كتب قديمة صافهم على بعض، وما يطوف ولا عدد من مجلة العربي، وشارع المكاتب بحولي يعرفه عدل لمن يمر..ثقافته عالية جدا ومبهرة ...
تصدقون..هالطفل في شبه منه!!!
يطق حديد (رفع أوزان) إلى أن أتعبه المرض وعاز علي أنه ترك الحديد لأنه كان يخليه ينسى همومه والانسان اللي طول عمره قوي يعور القلب لمن يطيح آآآخ يا خالي... في شغله مضحكة دايما نعتبره سوبر مان بالذات لمن يكون في مكان عام وبنت تكون متضايقة من شباب لاحقينها أكيد راح تشوفون "خالي مساعد" يلبي النداء ويبرح المزعجين والمتحرشين بالضرب ويخليهم يندمون أشد الندم وطبعا أهو ليس من النوع اللي ينقذ علشان يستفيد من الوضع بالعكس بس يبي كلمة وحدة حلوة ويمشي هههههه أهو يعرف أنه بنيت جسمه قوية فأبد ما يحب يتهاوش وشي حلو فيه أنه عارف نفسه وقادر يسوي كنترول بدون ما يتباهى ،ويستخدم قوته في المساعده فقط.
يقولون بريكه ما مثله بريك من أول لمسه يوقف فيعفس اللي يمشون وراه يمكن من قوة ريله!؟!...و كان في راعي بقالة ملاحظة أنه يكون دايس داخل الفريج لين يوصل بيت يدي فجأة يسمعون صوت قوي والسيارة توقف أبد جبال الطوفة بعد ما الكل غمض عينه ولف ويهه علبالهم دعم ويلاقونه صافط ونازل من السيارة وسعيد عادي . هههههههههه
أعزب ولم يسبق له الزواج وكل النساء يتيمون فيه لمن يبتدي بالكلام
وحاليا عمره 58سنة*_^ والسبب في عدم زواجه ورغبته في تكوين أسره لأنه كره العالم بعد وفاة جدته ويرفض التمتع فيه وكان عنده قناعة أنه بيموت من شدة حزنه ،وبعدها حاول أنه ينتحر بالحلال أي بطرق خفية لأنه يدري أن الانتحار حرام فقام يسرف في أكل الحلويات علشان يحوشه مرض السكر ويموت بالداء اللي توفت فيه جدته (طبعا ما ياخذ دوا) وفعلا صارله من بعض الأشياء اللي صارت لها وقام يدخن مع أنه تدين لكن !!! يترك ويرجع حسب المزاج، ويكثر من الملح وأي شي مضر بالصحة، بس ما نبي النكد وخلونا ندخل على الجانب الطريف من حياته لأنه كركتر ما حصلش
... دايما دعوته المشهورة يارب ارزقني 1000 حورية وردية وأحيانا يعدد ألوان الطيف كلها ورا كلمة حورية ... ما أدري من وين يايب هالدعوة... لا وهاذي الأيام يفكر يتزوج بس عقب شنو يحليله توه يفكر يستقر بعد ما عاش طول حياته راهب يهرب من النساء ولكنه أيضا يحب النساء ويحب أن يكون قريبا منهم باحثا عن شيء فيهم يشبه جدته،،،
..حمية..
أهو من النوع اللي يحب بين فترة و الثانية يسوي حمية طبعا بدون طبيب وبدون "عمات عين" بالكويتي الفصيح
في كذا مرة كانوا يشوفونه أخوانه أو خواته بوضع غريب يتكرر...يشوفونه مو مرتاح وكل شوي تقلب جبده (يرجع أو يستفرغ معدته) فسألوه عن السبب عشان يبطل العجب وكانت أجابته أنه متبع حمية !!!
وحميته كانت عبارة خمس تفاحات أو نصف رقية (بطيخ)مع لتر ونص لبن أو حليب طول اليوم وكل ما ياع(جاع)
شرب ماي أو زاد الفاكهة ...أظن بطلها لمن قام يتعب حيل ويدش بعد هالحمية المستشفى
وفي موقف آخر يخبرني به خالي "أبو أحمد"دخلت في ذاك اليوم على أخوي مساعد داره اللي في بيت يدتي (جدتي) أطق الباب بس مارد علي بسرعه...ولمن رد علي كان صوته تعبان وأسمعه من ورا الباب يقول...
خالي مساعد:أدخل عزيزي ...ادخل عزيزي
وإلا الريال متلثم ويتلوى وقاعد على سريره ويهز راسه
أبو أحمد :عسى ما شر يا خوي متلثم وحالتك حالة وأدخل عزيزي >>>ترى مافي غبار ههه
خالي مساعد:أسكت ياخوك ما أدري شفيني معتفس وحالتي حالة
أبو أحمد: لااا.. شصاير خير !...لا بآس عليك ...بس شمنه (من ماذا؟)
خالي مساعد:أبد ذاك اليوم وأنا أستمع للراديو وإلا قالوا الخل يذيب الشحوم، وأخوك ماصدق خبر لف له نص بطل خل على الريج
أبو أحمد:!!!!!!!!!!!!كاااااااااااااااااااااااااك الله يقطع سوالفك يا مساعد
خالي مساعد:بصوت مبحوح وشوية مبالغة لاستدرار العطف شسوي بعد صار اللي صار وخبرك أنا عجول
ههههههههههههههههه طول عمرك مجرم بنفسك (مو متأكدة إذا هاذي السالفة اللي سوا له بعدها غسيل معدة إلا لا)
..عدنان ودلال خرفان!.
خالي مساعد مثل ما قلنا يعيش عند جدته وهي من النوع اللي يحب الحيوانات...
وكان عندها نعجة ولدت خروف وخروفه صغار فاستانسوا عشان يتسلون فيهم، فاستشارت خالي
شنو نسميهم؟ وأهو قاعد يقرا الجريدة ويعدل نظارته .. فقال:عدنان ودلال طبعا صدمهم لكن مشوها لأنه جدته تحبه وكلامه أوامر وهالخرفان ما في نوع من الككاو والحلويات ما ذاقوه
...لي درجة أنهم ماقاموا ياكلون الخضرة والجت، وعصبت شوي يدته(جدته) لأنها تبيهم يآكلون الزايد من الخبز والخضرة بدال ما ينقط لكنهم صاروا ما يرضون بأي شي وصارت ذائقتهم للأكل عاليه وراقية صج لي قالوا...
"يا شين شي ماشابه هله" أهم شي خرفان ويتعنفقون وموعاجبهم ههههه وأكثر أكله حبوها "الكتكات" ^_^
..20 قوطي * 20 لتر..
مثل ما قلنا أنه أعزب يعني حياته مملة ومثل ما يقول المثل المصري"اللي فاضي وعندو وأت يعمل مآلب"
على سبيل المثال وحدة من حركاته...يدق على أخوه بنص الليل ويقوله فلان صوتك جنك قاعد من النوم لا يكون نايم بس أخاف أزعجتك >>> شرايك يعني ؟؟!!!
و إلا يدق تلفون على أخوه: ويقوله وأنت ياي ييب (أحضر =جيب)معاك لترين حليب و100قوطي حليب كي دي..
(وكل مرة يغير بالكميات والعدد ويزيد)وإلا أقولك خلهم عشر لترات فقام قاطعه اخوه وقاله:شرايك أيب لك بقره أحسن ترا يا مساعد ههههههه
وإلا يطلب عشرين قوطي هريس ولمن يسأله أخوه ليش عازم أحد يقوله لا بس عشان كل يوم أسخن لي قوطي !!!>>> هذا شيردون عليه ويقولن له؟؟؟ أهو بعد يوم واحد ما ينوكل شلون بعد 20 يوم خخخخخخخخخخخ موصج
عالعموم أهم يسايرونه بالحليب لكن مايسايرونه بقواطي الهريس*_^
*الهريس:(أكلة كويتيه شعبية تتكون من الحنطة التي تغلى بالماء ويضع معها اللحم)
*أهو ترى يدري أنه حجيه مو مقنع ويطفر لكن أهو يتعمد عنده هوايه تطفير الأوادم عشان لمن يعصبون يسوي سالفه ثانية ههههه
*لمن يسأل أحد عن شي وما يجاوبه يسوي نفسه أنك قايله الموضوع وأهو عارفه وحاب أنك تذكره فيه خخخخ
وفي مشكلة انه عطوف وكريم ومبذر زيادة عن اللزوم ...ففي مرة تعاطف مع راعي محل بسيط طايحين بجبده فازات (مزهريات) يشبهون اللي بالمطعم الهندي فقام تعاطف معاه وشرا منه كل الكمية وهالكمية تكفي سيارة نقل كاملة وطبعا لأنه ماعنده احد يصرف عليه فما يهمه ...وبعدها قام يدق على بيت..بيت من اخوانه وخواته وقال لكل واحد فيهم :تعالوا عندي لكم هدية واللي يسأله شنو؟ يقول لهم: (تحفة)...وبهالفترة كنا نبني بيتنا فلمن دق على أمي قالت: ياحلوه أخيي يظهر بيعطيني هدية البيت بما أنه قال لها أنه الهدية تحفة ولمن راحت له أنصدمت وإلا يعبي الدبة (صندوق السيارة) بكراتين وأمي لي ألحين ما افتحتهم وأشكرته وقالت: له ما تقصرلا خلا و لاعدم ان شاء الله بس شدعوه جذي مكلف روحك وأهو فرحان ويتبسم ^_^...ولمن رجعت البيت وأفتحت الكراتين وإلا كل كرتون فيه حول 12 حبه (أظن أكثر)من هالمزهريات ...جان تدق عليه أمي وتقوله: شنو هذا مساعد تبينا نتفالع فيهم بالبيت(نحذفهم على بعض)...واهو يضحك ويقول: لها لا اهو أممم وقال القصة ...أمي عطتنا ياهم وكنا يهال فكرنا نلعب فيهم بولينق لكن أمي تداركت الوضع وعطتهم اللجان الخيريه ... طبعا الكل ذاك اليوم دق وزفه ههههههههههه خخخخخخخخ بدع فيهم.
..حيوان يحب التمر..
أثناء فترة الغزو العراقي ... "خالي مساعد" رجل يعشق الدراما ويحب أن يأطر حياته وكلامه فيها
وغالبا يتكلم بالفصحى واغلب كلامه أشعار وحكم وقصص
فأعلن بأسلوبه، بأنه سوف لن يهمه أمر الغزو وسرقات الطعام أو التهديد بشحه وأنه سوف يجعل التمر هو
غذاءه حتى يأتي الفرج متمثلا بقصة الشيخ "فيصل آل سعود" عندما هدده الامريكان لأنه قرر أن يحرر فلسطين
وسرد لنا القصة كالمعتاد وقال أنه سوف يفعل مثل مافعل هذا الرجل البطل (خالي متأثر به بشكل كبير وهوفعلا بطل)
فقال بآكل تمر لين تتحرر الكويت
... وفعلا الريال ما جذب خبر واعتكف على أكل التمر، و كانت الأسرة الكبيرة جدا والتي تجمعت كلها في منزل جدي
يتلذذون بما لذ وطاب من الطعام إلا أنه لم يكن يدخل في فمه إلا التمر وما أدري إذا كان حلف ما يآكل غيره
كنوع من الإعتصام وتعويد النفس على القادم... وفي تلك الظهرية و الكل يستمع إلى الراديو بعد أن حاولوا
التقاط قناة ترفيهية وعدد من البشر حوله صغار وشباب وكهول ومافوق الكهولة حوله وإذ بالمذيع يسأل سؤال ألا وهو :
حيوان يحب التمر ماهو؟
وإذا بإبن خالي عبدالله وهولا يتجاوز الخمس أعوام يصرخ بأعلى صوته
"عمي مساعد"
مما أغضب خالي مساعد وزاد من حوره الطبيعي إلى أن صار حولا هههههه
وانفجر الجميع بالضحك وبدأ خالي مساعد يتمتم ويتوعد الصغير
هههههههههههههه تعيش وتأكل تمر هههههههههههههه
طرحوا عليه سؤال ماذا لو خلص التمر ؟! فلم يجب خخخخخخ
..الإرهاب والكباب..
في رحلة إلى مصر أم الدنيا
دنردن دنردن ....صوت البيونيلا يصدح ويرن في آذانهم بالقرب من الفندق الذي قرروا النزول فيه ...
عائلة مكونة من 7 أطفال وأم وأب وخالهم وصديق من مصر قرر أن يكون مرشد سياحي لهذه العائلة
في تقريبا فترة الستينات عندما بدأ الكويتيون يهربون من الحر بعد ما رشهم النفط وبدأت فكرة السياحة والسفر
كان وقتها "خالي مساعد" 12 سنة والبقية 10 سنوات سنتين 3 سنوات ووالدتي معهم وكانت بالمهد وعمرها أشهر
طبعاً توهم واصلين وريحوا شوي ألحين صار وقت الأكل نزلوا مطعم الفندق لكن جدي نزل عياله وزوجته للمطعم..
وراح هو وأخو زوجته وصديقه عشان يسون شوية أجراءات عشان الفندق
على الطاولة،، أتى القرسون: عاوزين تتغدوا (نوبي وعلى محياه ابتسامه)
فتقدم "خالي مساعد" ذو الـ12 عام وقاله: شنو في عندكم >>>داخل على مطعم هندي الحبيب
القرسون:عندنا كباب وكفته وو..وو...
خالي مساعد:إي كباب ...أممم>>>يظهر انه هذا الشي اللي عرفه هههه
القرسون: كم كيلو يا فندم؟
خالي مساعد:أممم أنا ..أمم وأمي وعليوي وفلان وفلانة وفلان وفلانه (طبعا قام يعدد أسماءالموجودين)
جان يأشر على أمي الرضيعة ويقول وافلانة كيلووو وأممم
القرسون :قاطع خالي وأشر على الطفلة ،،،ودي (مصدوم) ودي >>>مسكين على باله الكويتين أسود
خالي مساعد: (مو معبر القرسون) خلاص خلهم 7 كيلو >>>هههههه
القرسون: (قام يقول) دا ودا ودي كيلو
...في هالأثناء أتى جدي والبقية و سمعوا الحوار فعدل الطلب وطلب كيلوين، و أكلوا وأتعبوا من الأكل وزعوا الباقي
وخالي كان ناوي يطلب 7 كيلو يعني خروف كامل هههههه وإلى الآن و الكل يعايره بهذه الحادثة..
أتمنى انكم أستمتعتوا بشخصيته وأني قدرت أوصل طرافته
لأنه أظن ما عطيته حقه بالوصف والحروف بدون صوت وصورة تظل ناقصة
أتمنى لكم إبتسامات صادقة وحب ينبعث من أرجاء قلوبكم
كونوا سعداء ومبتسمين لا تنسوا الابتسامة صدقة وسر من أسرار محبة الآخرين
^_^
~~ دربكمـ خضر ~~
أأسف على الألوان في هذا البوست ؟؟!!
كتبت بوستات طويلة سابقا لكن لم اوجه المشكلة *_^سامحونا على القصور
.jpg)
