مدونة خاتون...أول مدونة تتخصص في الكوميديا الواقعية بالشرق الأوسط *_^

تمنياتي لكم بالإستمتاع هنا

الأربعاء، 10 نوفمبر 2010

Funny people in my life

~*~بسم الله الرحمن الرحيم ~*~
~*~السلام عليكم ورحمة الله وبركاته ~*~

صباحكم خوخي ونكهته تفاحي
مساكم فراولة وموز ومنجا
كوكتيل مو مساء هههه

عدت في بوســـPostـت جديد! وكلي أمل أن أرسم ابتسامة على محياكم
كل مقطع في هذا البوســـPostــت المهدى لقلوبكم الطاهرة النقية

..مسوي دعاية ليز..

الله يسلمكمـ هذا "عمر" ولد "البنت الهادية" وحدة من صديقاتي وتكلمت عنها سابقا

أحلى ليز وأحلى عمووور
شرايكم فيه قولوا "ماشاء الله"
منو تهقون ألذ اللي على اليسار وإلا اللي على اليمين
مع أني مو عسماوية بس بختار اللي على اليمين*_^
لأني أفضل الكيك على الشبس
*_^

..كفتريا شويخ..

كنت على يوم طالعة ويا أبوي فاستغليت الفرصة وقلت له بابا خل نروح كفتريا شويخ

"ترى كفتريا شويخ تبيع أحلى فطاير بالكويت ومشهورة جدا و مافي ديليفري"

المهمـــ... طبعا كان زحمة ومافي مسفط بالذات أحنا كنا رايحين بالrush hour

فأبوي قال أنا بسكر على هالسيارة إذا يا (جاء) راعيها حركي السيارة ،،، أثناء الانتظار فعلا جاء راعي السيارة

(ملحوظة: أنا إذا أحد نزل من السيارة أو نزلت أقفل الباب أو إذا أحد ركب أو ركبت أقفل الباب بشكل لاواعي)

المهم نزلت علشان أعدل سفطت السيارة وأسفط مكان الريال (الرجل) ولمن وصلت لباب السائق ومسكت المقبض أحاول افتحه مايفتحشي أجروا مايجرش والريال قاعد يشوف الفلم الللي قاعده أسوي ،،،فجاة أستوعبت اني قفلت السيارة ونزلت والسويج (المفتاح) بالسيارة

فجأة وإلا الريال قاعد يضحك على ذكائي والهنود كلهم ميتين ضحك خووو شويخ نصها هنود وشمتانين فيني الله يسامحهم

المهم مني مناك ... فكرت أنا شنو يوقفني بالشارع بين كل هالريايل (الرجال) فقررت أني أدخل الكفتريا وآخذ الرموت من أبوي

ولمن ييت (جأت) بدخل الكفتريا وإلا ريال (رجل)كويتي كبير بالسن يطالعني مصدوم ويأشر لي وينزل أيده محتار شلون يوجهني وطبعا أهو مصدوم لأنه هالكفتريا مشهورة انها مزدحمة بالرجال لكن أنا ماابي ادخل بس بشوف الوضع اذا أوكي بروح لأبوي ،،،وإلا أبوي طالع وقاعد يضحك لأنه حسني ضايعة وويهي يحمل علامات التحلطم والاحراج وقالي شيايبج قلت له السالفة وانفجر من الضحك لأني فضحته جدام الناس بذكائي والريال لحد اللحين يضحك أتوقع لي ألحين وأهو يقول قصة ذكائي للناس ...ومن بعدها قررت ما أعدل السفطة بشويخ لأحد ههههههههههههه


..عسكري همام ومنتبه تمام..

شاد حيله بوهنود ناوي يخدم الوطن وحاب المهنة ..لكن بالغ حبتين !!!ههههه


..يطفي التكيف ويلحفنا!؟!..

تخبرني صوت القطوة عن بعض ذكريات الطفولة
فترة بريك الغداء في كفتريا العلوم التي أصبحت الآن أشبه بمطعم هندي ناقص -5 نجوم
صوت القطوة: تدرين خاتون
خاتون :شنو؟
صوت القطوة :أتذكر قبل لمن كنا صغار كنا كلنا نتيمع(نتجمع) من كبيرنا لي صغيرنا بغرفة وحدة (طبعا اليهال بدون الماما و البابا)
ونحاول ما نطلع صوت علشان أمي وأبوي ما يدرون أنه احنا سهارنين ولمن نحس أبوي ياي
(قادم)
كلنا نمثل أن أحنا نايمين ومستغرقين بالنوم
خاتون:أيي
صوت القطوة :فيفتح علينا أبوي الباب ويشوف الوجوه البريئة مسطرة على طول الدار ويغطينا واحد واحد ويطفي التكيف
خاتون: ههههه هو؟! ليش يطفي التكيف؟؟؟!!!
صوت القطوة :هااااا أمممم تصدقين ما أدري ليش ؟؟؟
صوت القطوة: الأحلى أنه مرة قررنا نتحرش في أبوي مع أنه عصبي بس ما أدري شلون سكت عنا!!!
تآمرنا أنا وأختي الكبيرة وأخوي على أبوي وغير الصغار اللي جهزوا تب ماي بارد وكلنا تعاونا (طبعا على الشر)
وعلقناه(التب البارد) بطريقة لمن أبوي يفتح الباب يتسبح
خاتون:أيي وشصار ؟
صوت القطوة:صبري تييج السالفة أنت ليش كله عجولة ...الله يسلمج وكالمعتاد نتظاهر بالنوم ويعيد أبوي طقوس الليل بتفقدنا وإذ بأبوي يتلقى حمام بااااارد جدا(طبعا الكل ندم على الحركة لأنهم شكلهم توهم يستوعبون أنه في عواقب وخيمة) وإلا نتفاجأ بأبوي يضحك ويضحك ويضحك وأيي يلحفنا ويطفي التكيف ويمشي

ولازال إطفاء التكيف بعز الصيف وتلحيفهم سرا إلا يومنا هذا
ههههه بس فعلا أبوهم أبو حنون وطيب ويكفي سامحهم على فعلتهم الشنعاء
أنا لو مكانه جان أوريهم شلون الشغل.

..بابا عود في اسبانيا وعمر في كنتاكي..

جدي كان رجل يحب الأسفار ويحب الاضطلاع على ثقافة البلدان الأخرى ويحب السفر مع قروبات وربعه
في أحد الصيفيات الكويتية الحارة حيث الكل يهرب للبلاد الباردة كالطيور المهاجرة
ذهب جدي ومعه ممن يعرفهم اثنان(واحد أعمى و الآخر أخرس وجدي الوحيد الصاحي)
المهم في اسبانيا طبعا دولة ليست أسلامية
فيجب التحرص على ما يدخل في البطن فبالطبع لازم يقضونها بيض وسمج لأنه
أظمن شي المهم نزل جدي لمطعم الفندق مع الربع اللي معاه واتى وقت الامتحان
حيث ولا واحد فيهم يتكلم انجليزي علشان يتكلم اسباني فظلوا ربع جدي في حيرة
بينما جدي قال للقرسون ...باك باك بكاااك ثم تخيل أن بيده بيضه وأشار بيده ففهم القرصون بينما ظل صديقا جدي يحاولان أن ينتقلان للكلمة التي تلي كلمة I..I..I..I..I..I..I..I..I
ولا يعلم القرصون هل يتألمون أم يطلبون
وسألوه كيف طلبت فأعاد لهم مسرحية الدجاجة و البيضة
وسبحان الله صج لي قالوا الأطباع وراثة
تخبرنا زوجة خالي عن ابنها أنه يشبه طبع جدي في تصريف أموره
ولد خالي "عمر" أنسان ممتاز باللغة الاانجليزية لكنه لا يستعملها خارج اسوار المدرسة
بالاصح خارج سور حصة الانجليزي...
طبعا الشباب كله طلعات ويختمونها بمطعم سريع ووجبة من كنتاكي..ماكدونالز وشركاءه
المهم
يتوجه للكاونتر الذي ملئ بذوي العيون المشخوطة (الفلبينين) والفلبيني اللي كان يكلم عمر ما يفهم عربي وولد خالي مستعيل وماله خلق يتشدق بالانجليزي فقام يأشر على ريوله ويطامر ويأشر بأصابعه عدد معين ويأشر على صدره وأيده ويأشر بــ(لا )ويقول No ...وخلص أخينا طلب وكل خلق الله يطالعون بهالمخلوق الغريب
طبعا هالأنسان كله مسوي احراج حق اخوه الكبير ويبيله بوست بروحه
"ما عليه من شابه جده فما ظلم "
..صقر مايطير..

أخو زين الزاد حاب يوري زين الزاد شلون يقدر يسحب كروت من ولد خالته "صقر"

وهالعملية لها مصطلح علمي شبابي جديد أسمه "التخرفن أو الخرفنه" مسكين من صقر لي ****
وأجرى العملية جدام زين الزاد وبما أنه كان محتاج رصيد وطبعا رصيده كله من صقر المسكين
الخطوة الأولى أتصل أخو "زين الزاد "على "صقر"
الثانية رد عليه مع تغير الصوته وزين الزاد تبقق عيونها وتلوع جبدها ...وصقر المسكين يتجاوب مع صاحبة الصوت الجذاب (المسكين لا يعلم أنه ولد خالته)
الخطوة الثالثة قام يشكي الحال والضيقة المادية وشح الكروت ولأنه هالكروت

كلهم عشان يتواصل فيه معاه حيث أنه المصروف لا يكفي

الخطوة الرابعة تم إرسال الرصيد بنجاح
وإنفجار كليهما ضحكا وهذا جزاء كل من يرضاها على بنات الناس
طبعا أخو زين ماله بسوالف المغازل ويكرها علشان جذي يحب ينتقم من هالنوعية
وروحي يا فلوس صقر لذات الصوت الناعم.



..عطسة عسكري!!..

أبوي : آتشووووووو ...الحمد الله
خاتون: يرحمكم الله
أبوي:يهدينا ويهديكم الله
طبعا خلال هالفترة وبالذات عند مقطع الآتشوووو الكل طار و شير(شجر) مر جدامي وبيوت صعدت ونزلت
أوادم طاحوا كل هذا من تأثير العطسة (أوووخ قوية قوية ودنا نصدقج بس..)
المهم اللي بوصل له أنه عطست أبوي تطير بلد

..بعد ما عطس أبوي وشمته وشافني أنتفضت قال تدرين من سنين كنت بمطار مصر
وفجأة عطست وعفست المطار وقفت على قدم وساق جان أيني واحد مصري وقالي
أنته عسكري يا أفندم
طبعا أبوي رد عليه وأهو يخزه مستغرب أييه
(هذا المصري حكيم عنده خبره بعطسات الناس حسب الوظيفة )ههههههه
أهم شي انته عسكري يمكن عطست أبوي عسكريه

..ومرة بدون مبالغة ولا افتراء عطس وكان على الارض زهيوي جان ينقلب على ظهره
ومرة كنت معاه بجمعية جان يعطس وإلا الهندي مسكين حذف قواطي الروب اللي بيده وعفس سطرة كاملة واضطر يعيد الترتيب
أمي صار لها مع أبوي 22 سنة ولي اللحين تفز من عطسته
فيا جماعة الخير اللي يشوف أبوي مستعد يعطس فلينجوا بنفسه
أنا بلغت لا تقولون ما قلت
ههههههههه


..مين؟ أنا!..

طبعا أختي كرماري هاذي السنة أول سنة لها جامعة وحاست ولفت بداية هالكورس على محاضرة مو عارفين يضبطون مكانها كل يوم لهم مكان لا وياخذون غياب .. يعني فوق شينهم قوات عينهم المهم
كل يوم وينج ياكرماري أكيد طاقة شلالة وتدور عند قسم الدكاترة
ففي يوم رحت وياها لأني أبي أفهم شالخربطة لأنهم فعلا ضيعوا محاظرات عليهم وعفسوهم ولا بلغوهم بالمكان فتوجهنا لمكتب دكتورها
ووقفت عند الباب جان أقولها يللا طقي الباب
جان تطق الباب... طق طق طق
جان الدكتور يقول تفضل
قلت لها دخلي
جان ترد علي نطري
وتطق الباب مرة ثانية ...طق طق طق
الدكتور: مين تفضل ... (ويكرر):مين
كرماري أحمر : أنا
خاتون: شفيج
يقاطعني صوت الدكتور :مين ؟؟
كرماري أحمر:أنا
خاتون : ههههههه (ضحكة مقموته) أنت مينونة أنت على بالج طاقة الباب على أمي وأبوي يعني أخاف بس يعرفج خخخخخخخخخ بس ناقصج تقولين ذات الرداء الأحمر ... شنو أنا !؟!
طبعا فتحت باب الدكتور والدكتور شكله ضاحك لين قايل بس على المينونة اللي تطق الباب وتقول أنا شكو
المهم طلعت من المكتب ..طبعا انا اراقب بهدوء

جان أقولها حمدي ربج المكان فاضي مافي أحد سمع خبالج جان نلف ويهنا (وجهنا)وإلا في صبي ماشاء الله

سامع الحوار من طق طق لي السلام عليكم وميت ضحك ومن الضحك قاعد على الأرض
حسبي الله على بليسج يا كرماري فضحتينا هههههههههههه


..أجرة البنجر..

تركب نملة النمولة كعادتها سيارتها متجهة لجامعتها الواقعة في شويخ ولكن اليوم يوم مختلف حدث فيه أمر يحدث للكثير ولكنه يضايق النساء بالذات كثيرا ألا وهو البنشر (انفجار العجل) المهم تتضايق واذا أماامها شخص وهندي يصلحون بنشر لسيارة أخرى فتوقعت أنه هاذي الشركة اللي تسوي سيرفس بالشوارع أو بنجرجي
فطقت هرن وأشرت على مكان البنجر وأهي داخل السيارة ولا حتى فكرت تنزل الدريشة وكلمتهم بالأشارة يعني
المهم خلص الريال البنجر يعطيه العافية جان تنزل الجام(النافذة) وتمد له المقسوم (فلوس البنجر =أجرته) وإذ بالريال يطلع كويتي تقريبا شكله بالأربعينات (طبعا توها تشوفه) وفاعل خير كان موقف علشان يساعد اللي قبلها وابتلش فيها

وقعد يضحك وقلها أمشي أمشي طبعا أهي انحرجت وتمنت الأرض تنشق وبدت تتصل على قروبنا وحده وحده تبجي بجي الاحراج وتتشكى بس الحمد الله انا هديتها وقلت لها أنت منقبة ما راح يعرفج إلا جان راح يعرفج من السيارة هههههههههه الظاهر الريال قال نعيش ونشوف أو قرر يشتغل بنجرجي على الطريق بما أنه السالفة مربحة هههههه


..ماخذ بنفسه مغلب..

يقول خالي شايب راح تايلند وقاعد يقول ياحلو شعب تايلند محترمين يقول مافي تايلندي مر الا وانحنالي فاهو استحى فقام ينحني لهم يعني يجاريهم ويقول حق ربعه اللي جباله ...جان يقولون له مو لك للبوذا اللي وراك
هههههههههههههههههههههههههههه


..They R nutty but goody..

عيال خالي شوي مشاغبين ومرحين
في عامل بالجمعية اهم يحبونه ويحبون يتحرشون فيه اهو ريال كبير شوي وأسمه "رمضان"
فكل بين فترة والثانية يروحون يقولون له حجي رمضان ...متى أيي العيد؟... لكن الحركة دايما تخليه يعصب ويثور ويلحقهم ولأنهم يهال فهذا اللي يبونه وشكله حجي رمضان عاجبه الوضع يتسلى فيهم*_^

ومحد يقدر يطيح بلسانهم
في محاسب بالجمعية نفسيسة(ثقيل دم) والكل ما يحبه وأهم بعد لهم سوالفهم بس
اهو يمصخها فسبهم وقال لهم" يا عيال الوسخ "
جان يرد عليه واحد من عيال خالي وقاله ابوي عاد توه متسبح هههههههههههههههه
بس ترى ذربين ردوا باحترام غيرهم يطق المحاسب

..آخر ابداعات جنجر..


تأتي أختي جنجر لتعلن لنا أن اصلاة العيد في الرابع عشر من نوفمبر و العيد في السادس عشر

وبعد محاولات طويلة لإقناعها وفجأة قالت عندي دليل على كلامي فراحت وارجعت ومعاها رزنامة جان تقول شوفوا مكتوب على رزنامة العجيري هالكلام وتحاول تقنعنا بصحة كلامها ،،،فحبينا نفهمها أنه هني للتذكير وهني يوم العيد لكن البنت مقتنعة بكلامها و ما باذنها ماي وتنطر العيد ايي علشان تثبت لنا صحة كلامها
يعني بذمتكم هل هلاانسانة عاقلة؟! المشكلة تعتقد دايما انها حكيمة (ملاحظة عمرها 17 سنة )
وقبل جم يوم بالكويت صلوا صلاة الاستسقاء وكان قاعد الوالد جان اقول له: يبا ليش مو قالبين دشاديشهم يكون احلى واحس في ترابط جان تنط جنجر باسألتها الذكية اللي دايما تفحمنا فيهم وتقول وحتى جواتيهم (احذيتهم) على ويهكم ماي الورد طبعا كل اللي قاعدين شرعوا عيونهم انبهارا بذكاءها فسألناها قصدج نقلب اليمين و اليسار قالت لا كل فردة نلبسها بالمقلوب وما فهمت الا لمن شافت عملي ههههههههههههه
طبعا ابوي قال يكفي يلبسون بشت ويقلبونه
انزين ليش مو لابسين بشوت لبسوا يعني حسسونا انها صلاة استسقاء اقل شي قلبوا دشاديشكم عند باب المسيد

جنجر صارت نباتية ...بس تاكل دياي واحيانا عرايس وبرجر وبس
في الختام جنجر تقول لي انه في يوم راح يجتمع فيه رمضان مع يوم عرفا واحتمال معاهم يوم عاشوراء وراح تصلي في هاليوم من الفجر لي الضحى ولمن قلت لها شفيج جم مرة افهمج واقول ما يصير تقول امبلا يصير السنة تجدم هههههههههههه

قلت لها هاذي ظاهرة كونية هذا يوم القيامة المهم البنت مو معبرتني ومقتنعة برايها وطالبتني باعتذار رسمي بمدونتي لها اذا يا(جاء) هاليوم والتحدي قائم.

في ناس يقولون لي قللي عدد القصص وفي ناس يقولون خليهم وايد فأنا
أبي رايكم كم تتوقعون العدد المناسب علشان ما يتعب ويمل اللي يقرا
وأشكر قراءتكم وأتمنى أني قدرت بنهاية هالبوست أكون قدرت أرسم
ابتسامه صادقة ونقية في قلوبكم وعلى محياكم.
دربكم خضر .

هناك 47 تعليقًا:

  1. خخخ مادري شعلق عليه ..

    بس توني ادري جنجر اختج بس حلوه يمعت كل المناسبات الدينيه بيوم واحد بس باجي العيد والاسراء والمعراج والمولد النبوي :p

    ليش يقلبون الدشاديش بصلاة الاستسقاء وشلون مافهمت؟؟

    وخخخخخخخ وعليه عليه مال البوذا :\

    وبدعت كرماري جن قالت انا ليلى انا ليلى خخ..

    وماشاءالله انا ابوي يعيب ع عطستي يقول عطسه اتجه بس لازم هاااااااااااااااااااااتشو :\ عاد صج ابوج عسكري؟؟

    والله يحفظ البيبي يارب..

    بالنسبه لعدد القصص عن نفسي اسمتعت فيها ..

    وانتي سوي اللي يريحج :)

    ردحذف
  2. ضحكتيني ياخاتون الله يونسج ويسعدج :)

    بس كرماري وطقة الباب و "اانا" عجيبة ;)
    وجنجر صج بدعت هههههه امبيه مو جذي عاد
    هذيل الي يسوون نفسهم حكيمين جذي يطلعون p;
    وأم البنجر أمبيه لا إبدااع والمشكلة بكل ثقة تعطيه المقسوم ههههه

    مادري أعلق على شنو ولا شنو
    كل سالفة أحلى من الثانية
    وسوي الي يريحج كل شي منج حلو ;)

    ردحذف
  3. مشكلة السفطة ;P
    قصة الدياية مو صج
    اختج مع الباب فلـــم .. دشي تالي قولي منو..بس "أنا" فيها ثقة كبيرة ;p

    ونستينا كالعادة بطلتج الحلوة
    :)

    ردحذف
  4. نمله النموله10 نوفمبر 2010 في 11:14 م

    OMG
    OMG

    ستايل شتوي :)

    البوست يونس غير مزاجي
    بشم هوا و لي رده

    ردحذف
  5. اكثر وحده ضحكتني حقت البنجر هههه

    خاتون
    الله يوسع صدرك بالعافيه

    استمتعت بكل قصه

    ردحذف
  6. هههههههههه
    والله دمك خفيف يا خاتون...


    دمت بخير.

    ردحذف
  7. كل كوم و الهندي كوم

    جد ضحكني
    الله يقطع سوالفهم
    لووووووووووووووووووووووول

    ردحذف
  8. السلام عليكم ورحمة الله و بركاته

    يعطيكِ العافية و الله ذكرايات حلوة الله يديم المحبة و الفرح بينكم ... ياسلام على ليز بالخل يمممممممي و البيبي امور الله يحميه .. يالله اكشفينا بالـ بوست الجاي عن اعترافاتك .. مودتي3>.

    ردحذف
  9. نمله النموله11 نوفمبر 2010 في 6:20 م

    نمله النموله تتحدث:

    شنو استانست ع نشيدج عجيبه حملتها وحطيتها منبه
    ابوي بغى يكسر تلفوني من الازعاج :)
    ..
    ليكون عطست ابوج معاها كحه مع بعض ما تفرقين بينهم !@ اذا من هالنوع فهي ازعاج ودمار وعواصف ..وتعبه بعد

    ..
    مادري ليش ما فهمت قصه زين الزاد حسيت ما استوعبتها
    هل الحركه جحويه((من جحا )) والا يتراوالي!!
    ..
    يحليلها جنجر مبدعه
    اهي وبابايها
    تصدقين نفس الشخصيه
    :)
    ..
    قررت اني اقاطعج ان مادشيتي فيس بوك
    لج مهله نص ساعه من قراءه التعليق والا نمطر عليج طناقر
    يقولون لج موضه التطنقر الحين
    خخخخ
    *_^
    ..

    ردحذف
  10. نمله النموله11 نوفمبر 2010 في 6:23 م

    اي صج انا اقولج لا تقصرين البوست
    خليه جذي حلو
    وقت الملل ادش واقرا
    عكس اذا كان قصير مرةوحده ينقرى وبس ويسير ممل
    ..

    ردحذف
  11. رورو الشخبوطة ...

    جنجر أختي من 17 سنه
    المشكلة ما طرت على بالها باجي
    المناسبات وإلا جان ذكرتهم

    قلبت الدشاديش من السنة... كأنهم يشكون الحال لله

    مال الببوذا يقولج قام يسب ويلعن
    بشعب تايلند بعد ما درا ههههه

    الكل قالها مثل ما قلتي بس ناقصج أنا ليلى

    اليايل ما يحبون الاختصار ههه
    إي نعم الوالد عسكري سابق
    بالداخليه وحاليا متقاعد

    تسلمين يارب ويحف لكم بيبياتكم

    سعيدة باستمتاعك بالقصص
    وتسلمين على مشاركتنا رايج

    حياج الرحمن عزيزتي ^_^

    ردحذف
  12. BookMark...

    عسى الله يونسج بالإيمان وطاعة الرحمن

    كرماري كلها بدعة ... جنجر الكل متعاطف
    معاها ومع ذكائها مسكينه
    أهم مقتنعين أنهم حكيمات وجنجر بدت بتأليف الحكم وأمثال شعبية خاصة فيها

    أي نملتنا ما تآخذ شي ببلاش سلم واستلم هههه

    حبيبتي عيونج الحلوة
    شكرنا على مشاركتنا الراي
    حياج الله دائما عزيزتي
    ^_^

    ردحذف
  13. Seema*...

    حدها كانت قصة السفطة محرجة
    لوتسمعين القصة بعد سماعي تموت من الضحك أزيدج من الشعر بيت اللي رايحين مع يدي واحد عمي و الثاني أصمخ وأظنهم أحسبوا يدي أطرم لأنه ما حجى هههه

    كرماري ثقتها عمياء بمعنى الكلمة

    طلتج الأحلى عزيزتي يسعدني وجودج

    حياج الرحمن عزيزتي
    ^_^

    ردحذف
  14. مبدعه ...
    هالأنسانة نص مواقفها المضحكة بالسيارة

    حبيبتي تسلمين على الدعوة ولك مثله يارب

    اسعدني استمتاعج وحضورج الطيب

    حياج الرحمن عزيزتي
    ^_^

    ردحذف
  15. سواح في ملك الله-...

    يسعدني أن تعجبك احدى القصص
    ويسعدني حضورك الزاهي الجديد هنا

    حياك الرحمن دوما هنا معنا
    ^_^

    ردحذف
  16. أبو حسام الدين...


    تسلم أخ أبو حسام
    أهم شي الإنسان يدخل سرور على مسلم
    وبدون كذب
    ودمت بخير

    حياك الرحمن دوما هنا
    ^_^

    ردحذف
  17. ناعمة الهمس ...

    بصراحة هالهندي بغض النظر عن استذباحة ليكون
    بطل العالم في كما لاجسام إلا أنه وطني ونبيل

    حياج الرحمن عزيزتي
    ^_^

    ردحذف
  18. ✿ الآء Ƹ̵̡Ӝ̵̨̄Ʒ ...
    وعليكم السلام ورحمة الله وبركاته

    الله يعافيج..يارب ولك مثله عزيزتي ...تسلمين ويحميج لمحبيج يارب.. إن شاء الله على امرج البوست القادم بيكون اعترافات بس هالبوست اضطريت انزله لأنه كان وعد لناس معينين *_^

    حياج الرحمن عزيزتي
    ^_^

    ردحذف
  19. نمله النموله...
    خاتونه تتحدث:

    أي أكيد بينزعج لأنج حاطته منبه وأنت راسج ثقيل المسكين أكيد سمعها عشر مرات ورا بعض هههههههه

    لا يا معودة بس عطسه يعني سبريت كل وحده لحالها

    باختصار اخوها يسحب من ولد خالته صقر كروت لأنه يقنعه انه بنت محتاجه لكرت وإلا بتموت

    خخخخخخخخخخخ
    ما أدري ما شفت الرسوم بس أشوف الدعاية بس جنجرنا مقصود فيها الدياية اللي "بجكن رن"

    ويع الفيس بوووك كريه :d

    ما تقدرين تقاطعيني هههه
    شقالولج منتجات الدنمارك عشان تقاطعيني خخخخ

    حياج الرحمن دوووم نمولتي
    *_^

    ردحذف
  20. نمله النموله ...
    ان شاء الله
    زين يعني صارت مدونتي وسيلة ترفيه
    شرايج بالنشيدة اليديدة
    *_^

    ردحذف
  21. وعليكم السلام ورحمة الله :)

    يله نبلش :)

    أولا أسم الله عليه الله يحفظه يارب مع إني عصماوية راح أختار معاك اليمين :)

    موقف الكافتيريا أبداع الله يعينك صارت ووياي مرة يالجامعة نزلت ونسيت المفتاح بالسيارة لا وشغالة بعد :)

    أما يطيفي التكيق ويلحفنا هذي الله يعينهم عشان جذي زهبو له حمام ماي بارد يعني ترى إحنا حرانين :)

    أم بابا عود وعمر بصراحة حييل ضحكت لأني تخيلت الموقف :)تلقين المحاسب قلب ماروكو من الصدمة :)

    أما كارماري فصلت عليها بصراحة حرام مستحية توها مو عارفة الوضع أتخيل شكلك خاتونه يمها علامة إستفهام كبيرة :)

    أما البنجر فإبداع أمبي صج إحراج لا وما كلمتهم كليش بس ناطرة الحساب المسكينة أكيد إنحرجت حدها :(


    أما جنجر ناقص تقول لج أن السنه أصلا عبارة عن إسبوع واحد بس :)

    التحدي مازال قائم متى النتيجة طيب ؟:)

    الله يسعدك عزيزتي كما تسعدينا دوما

    أما عن عدد القصص عن نفسي أشوف إنها ممتعه وتخلص بسرعة وما أحس بملل بالعكس أنطر البوست نطرة :)

    فأنتي سوي اللي يريحك وتحبينه وكل شيء منك حلو :)

    دمتي بخير وسعادة يارب :)

    ردحذف
  22. كوكتيل...

    يازين ما أخترتي *_^

    أنا بعد هديت السيارة شغالة ههههه الحمد الله يعني مو بروحي بهالعالم مبدعة ههههه*_^

    فعلا مساكين اللحين متعقدين من الحر هههه

    اهي واقفة على المحاسب لا تنسين الجمهور الغفير سواء باسبانيا و إلا بكنتاكي هههههه

    جنج دارية شنو وضعي ^_*

    أم البنجر اندقرت دقرة معتبرة خخخخ

    جنجر ودها تقول أكثر من جذي ودها تختصرهم بيوم بس محد معطيها على هواها
    النتيجة بعد ما أسئل د.صبري الدمرداش *_^

    أجمعين حبيبتي الله يسعدنا بالإيمان وطاعته

    خلاص عيل أتخذت قراري بخليهم بهالرينج
    تسلمين حبيبتي على التشجيع

    وياج تدوم علينا السعادة و الخير

    حياج الرحمن دوم عطر هالمدونة *_^

    ردحذف
  23. ههههههههههههههه
    وربي وربي مواقف وقصص طريفه ..
    ربي يحفظك ويخليك خاتونة على هالبوستات اللي تينن <== تأثرت من لهجتك الكويتيه ^^

    وشسسمه لاتقللين عددهم بالعكس حلو كذا

    شكرا الك

    ردحذف
  24. مبدعة دائما ياخاتون
    لم تروق لى المواقف بقدر ما راق لى اسلوبك فى التعبير
    فهذا امر ليس باليسير
    لاحظت عموما ان الاخوة فى الكويت اسلوبهم شيق وظريف
    تحياتى خاتون
    وامنياتى لكى بالسعادة دائما

    ردحذف
  25. صباح الخير..

    طبعا أختار إلي عاليمين..ماشاء الله عليه الله يحفظه..
    يحليلج تخيلتج وإنتي بذيج الزحمةفشششله..لقى أبوج شيء عليج عشان يضحك عليج دووم..

    صدق ليش يعني يبند المكيف عنهم!! أكيد يدري بمكرهم عشان جيه يعاقبهم..بس حركة الماء قويه.

    المهم أنه يدج ذكي وعرف كيف يدبر نفسه..بس حفيده عياز بشكل غريب مع أنه كان أسهل له يتكلم بدل كل هالحركات, يمكن قاصد يسوي رياضة!

    يؤيؤ فششششله,سالفة البنجر.. لوأنا منهابيغمى علي..بس حتى لو كانوا مثل ماظنت أحس مش حلو تدق لهم هرن بس!!

    أما أختج سالفه..يحليلها خجوووله, بس يلا شوي شوي بتتعود على الجامعة وتعتمد على نفسها..

    وجنجر عبقرية زيادة عن اللزوم..

    حبيت سوالفج وونستينا..
    الله يفرح قلبج دووم يارب..

    وعلى عدد السوالف على راحتج كل إلي إيي منج حلوو
    ودي وإحترآمي لج الغاليه..

    ردحذف
  26. الأخت الفاضلة :: خاتون ::
    أسعد الله أوقاتك بكل خير
    ما شاء الله
    كوكتيل طريف
    أمتعتنا بأسلوبك
    وأحرفك وصورك :)

    أرق التحايا

    ردحذف
  27. *_^ صوت القطوة14 نوفمبر 2010 في 1:36 م

    السلام عليكم

    صوت القطوة تتحدث افسحو لي المجال

    هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    بعد ما خلصت بس اخاف يزدحم المكان بضحكاتي
    الله يعطيج العافيه ضحكتينا

    من اول ما نزلتي البوست و النت عندي معلق الحمد لله اليوم قدرت اقراه

    بس اقعد مثل العاده بوستج يضحك بس انا هذي عجييييييييييييبه
    بالاول قلت كورماري هاديه ما يطلع منها هالسوالف بس يوم بتدليني عن مكانها اهني عرفت سوالفها بالتطبيق العملي
    كاااااااااااااااااااااااااااااااااااك

    لا وجدج انسان شكله مرح لاقصى الحدود ونقل هالمرح لكم بالوراثه بس ما اعتقد انكم راح تتقلبون على ولد خالتج ههههههههههههه

    و خاتون لا تنسين تخليلي قطعه من الكيكه عسى ربي يحفظة ان شاء الله و يطرح في البركه
    عاد احنا خل نقول حق البنت الهاديه ان نبي نشوفه و ناكله بعدين موهاهاهاهاهاهاها لا تقرى تعليقي ما راح تخلينه نشوفه ما شاء الله عليه

    وعلى فكرة ابوي لي الحين و احنا كبار يشيك علينا نايمين و لا لأ بس الشي الي تطور فيه ان ما يطفي التكيف لانه سنترال بس كل يوم يقول طفوووووو السنترال

    خالج شايب نكته و عيال خالتج بعد بس الحلو انهم مؤدبين عسى الله يوفقهم ان شاء الله

    اقول شنه الشطانه و المرح وراثة في عايلتكم عسى الله لا يغير عليكم ان شاء الله بس الاحلى ادبكم ما شاء الله عليكم

    خاتون امس طلعنا من الصبح لي الليل صلاة الظهر و العصر و المغرب و العشاة كلها برة على قولة ابوي صرنا جواله رحنه 5 اماكن تقريبا ويوم ردينا حسيت بمعنى شنو ان الطلعة اتعب

    و الحين اتتركج في امان الله و عيدج مابرك و عساج من العايديد و الفايزين ياااااااااااااارب

    *_^ و الحين ممكن ينتقل المايك لج

    ردحذف
  28. يابوووووووووي انفضحوا الاوادم

    كل موقف اطرف من الثاني ...


    للحرم عزمت للروحه ...امين ..يارب يجعلنا منهم بالايام القادمه

    ردحذف
  29. عيد سعيد مبارك...
    نبارك لكم حلول عيد الاضحى المبارك لعام 1431ه-2010
    اعاده الله سبحانه وتعالى عليكم بالخير والبركة والرحمة والغفران...
    تقبل الله اعمالكم وغفر ذنوبكم ورحم موتاكم وعفى عن تقصيركم
    ودفع عنكم كل مكروه ...
    نسأله تعالى ان يعم برحمته الامن والرحمة والبركة والسلام
    على البشرية جمعاء...
    انه سميع مجيب الدعاء...
    اهديكم عطر الورد وألوانه...
    وارسل جواب انتم عنوانه...
    اهنيكم بمقدم العيد وايامه...


    دمتي بخير...

    ردحذف
  30. ẽмan.н ♥...

    اهم شي عندي وناستكم يسعدني انه قصصي راقت لكِ

    تسلمين حبيبتي آمين ولك مثله

    تأثري حبيبتي على راحتج ههههه
    ان شاء الله من عيوني الثنتين تآمرين أمر
    العفو عزيزتي

    وحياج الرحمن دوم منورة المكان
    *_^

    ردحذف
  31. عباس ابن فرناس ...
    تسلم

    اشكر اطرائك على الاسلوب فأنا يسعدني أن أقدم المضمون بصورة تروق للقراء شكرا

    نعم أوافقك الرأي بأن أسلوبنا ظريف ...وفي عدد من الاستطلاعات و الاحصاءات تم تصنيف الدول الأخف دما وأكثر فكاهة وكانت مصر دائما الأولى والكويت الثانية على المستوى العربي

    تشكر آمين ولك مثله في الدنيا والآخرة

    حياك الرحمن دوما هنا
    ^_^

    ردحذف
  32. mese ...
    صباح /مساء الخيرات والليرات*_^

    ذويقة ماشاء الله عليج ...آمين يارب

    تصدقين عاد ذاك اليوم تقولين
    الكويت كلها هناك ههههه

    أهم نفسهم مو عارفين ليش يبنده ههههه

    على قولتج يدي ذكي و ولد خالي
    فعلا رياضي شدراج هههه

    اهي فعلا افتشلت وقامت تدق على
    وحده وحده تتشكى وتبجي ههههههه

    ان شاء الله الله يسمع منج

    الكل يقول لجنجر جذي

    آمين حبيبتي ولك مثله

    تسلمين وجودج وودج واحترامج على العين والراس

    حياج الرحمن دوووم عزيتي *_^

    ردحذف
  33. محمد سعد القويري ...
    وأسعد أوقاتك ومن تحب

    نسلم... وأشكر تشجيع
    وكلماتك الطيبة

    حياك الرحمن دوما
    أستاذنا الفاضل
    ^_^

    ردحذف
  34. *_^ صوت القطوة...
    وعليكم السلام والرحمة

    ما شاء الله تعبت وأنا أقرى ضحكتج
    دوووم الضحكة ان شاء الله

    يعافيج يارب

    قولي للنت اللي عندج
    (الجلب اللي عضك طقينا بس لاتزعل ) ههههه

    يطلع منها ونص بعدج ماشفتي شي
    شسالفة مكانها؟؟!

    تقدرين تقولين أنه المرح وراثة
    لاولد خالي هذا بالذات نتقبل منه
    في بوستات قادمة راح أ
    ذكر قصصه وبلاوية هههههههه

    تقول ناوية تيبه الجامعة...لاتحاتين بنقرصه ونعضضه هههههه ياحلوه وعسى ربي يحفظه لميمته ولنا وللي يحبونه

    عسى الله يخليه لكم ويديم عليكم حرصه وحنانه
    ويرحمكم من الحر ههههههههه

    اي والله اهم نكته ويطفرون بس مؤدبين

    ههههه تسلمين ماعليج زوود

    KNOW u GET ME *_^
    علينا وعليج يعود ويتبارك ونكون من
    الفايزين بالأجر والجنة

    هوو لي اللحين اهو ما انتقل *_^

    حياج الرحمن دووم قطوتي العزيزة
    ^_^

    ردحذف
  35. bu-saad ...
    جنك ما شفت شي استر على ما وايهت
    منك نتعلم خفت الدم

    يارب نروح يميع ما يندرا يمكن السنة
    الجاية تنكتب لنا
    وسلملي على الوالدة وأمي تسلم عليك وعلى الوالدة وايدوايد *_^
    وشد حيلك بالدراسة ولايوقف كملها لي الماستر
    حياك الرحمن يابو سعد دووووم
    ^_^

    ردحذف
  36. OPENBOOK...
    اسعد الله ايامك بالخير واليمن والبركات
    لا اعرف كيف أرد على هذه التهنئة الراقية
    عيدك مبارك وتقبل الله منك صالح الأعمال
    ولك مثل ما سئلت لنا وزيادة

    أحسنت التهنئة
    وبخير دمت

    حياك الرحمن دوما هنا
    ^_^

    ردحذف
  37. لووووووووووول

    مت من الضحك ربي يسعدج دنيا و اخره
    صرااحه ما ادري شاخذ و شخلي

    بوست خفيف طريف جدا

    ربي يوفقج يااختون ويشرح صدرج مثل ما شرحتي اصدورنا بهالبوست

    ردحذف
  38. ~حَدِيـثُ الفَـجْـر~...

    آمين أجمعين حبيبتي
    يسعدني وجودج وتشجيعج
    آمين يا حبيبتي بالإيمان
    وطاعة الرحمن يكون الانشراح

    حياج الله دوم وكل يوم هووون
    *_^

    ردحذف
  39. تنويع ممتع كالعادة
    يعطيك ألف عافية خاتونه
    بالعكس انا إذا أبي أوسع صدري أجي مدونتك لأنها مليانه وكل شي فيها ممتع ونكهته مرح وخفة دم

    شوفي الأخضر إللي على اليمين أفضل :)
    ماشاء الله عليه روعة الله يخليه لأمه وأبوه

    أختك نفس حكاية أختي أول سنة بالجامعة ومحتاسة على قاعات المحاظرات وكل يوم المادة تتغير من قاعة للثانية وبعد ياخذون الغياب
    المشكلة يروح الوقت وهي تفتر بالأدوار تدور على القاعات .....
    وعلى هالحالة أسبوع مهمومة ومحتاسة بس بعدين أعادوا قوائم الأسماء من جديد لما ترتبوا زي العالم والخلق

    يسلمو ياعسل على البوست الرائع
    وكل عام وعيدك أحلى
    وأيامك سعادة بالطاعات والخير

    ردحذف
  40. خاتون !!
    موفاقده شي ؟!
    او اشياء ؟!!
    شوفي يمج

    ردحذف
  41. مثل كل مرة تضحكيني وتونسيني يا خاتون
    عسى الله يسعدج دنيا وآخره يارب :)

    أحلى قصتين عطسة أبوج وسالفة البنجر
    ضحكت بصوت عالي لما قريتهم,, عسى ما يمر أحد عند داري ويقولون عني استخفيت :p

    أما عدد القصص في البوست فكل شي منج حلو :)

    ردحذف
  42. مرة استانست وانا اقرا
    يحليلكم بس
    إما عطسة الوالد الله يحفظه لكم ذكرتني بعطسة جدي الله يعطيه الصحة والعافية :) مرعبة هع
    ولا آخوي لاعطس ينقز لورا من قوة عطسته D:
    وكل عام وانتي بصحة وسعادة ونجاح ^^

    ردحذف
  43. الغـــــدوف...
    تسلمين عزيزتي
    الله يعافيج
    يسعدني أن تكون مدونتي أحد مصادر بسمتك
    وهالشي يشجعني أني أستمر

    ذوقج حلو هههه تسلمين

    بالضبط قلتي قصة المعاناة الصحيحة علشان
    جذي أحنا العرب ما نتقدم لأن أحنا فوضويون

    الله يسلمج يا مربى
    وعيدج أحلى
    آمين أجمعين يارب ^_^

    ردحذف
  44. نونو ...
    وينج وراي و إلا يميني و إلا يساري
    لا تخرعيني
    راح التفت شوي شوي
    هههههههه
    *_^

    ردحذف
  45. Amwaj ...
    حبيبتي والله سعيدة بهالشي وأتمنى لج السعادة دوووم

    ههههههه اي في اشياء لها ارتباطات
    بحياتنا تثير ضحكنا أكثر من غيرها
    عادي أنا ساعات أكتب البوستات وأضحك
    والكل قام يعرف أن السبب أكتب بوست
    وبالذات أنه كل اللي أكتب عنهم حقيقين وأعرفهم


    تسلمين لي عيونج الحلوة
    ^_^

    ردحذف
  46. سلآم ...
    ونسج الله بالإيمان وطاعة الرحمن

    الله يخلي لكم جدكم ويخلي لنا أبينا
    أسعدني تواجدج وتعطيرج لمدونتي بتعليقج
    وأنت بصحة وعافية وحياتج سلام وسعادة يارب
    حياج الله دوووم وكل يوووم
    *_^

    ردحذف

حياكمـ،،،