مدونة خاتون...أول مدونة تتخصص في الكوميديا الواقعية بالشرق الأوسط *_^

تمنياتي لكم بالإستمتاع هنا

الأربعاء، 22 سبتمبر 2010

شرايكمـ؟!؟


~السلامـ عليكمـ ورحمة الله وبركاته~

شلونكمـ؟ شخباركمـ؟ عساكمـ بخير؟
أتمنى أن تكونوا بخير وتعلوا وجوهكمـ
الإبتسامة ^_^

وتفضلوا هالبوست وإن شاء الله يكون خفيف على قلوبكمـ
فكرت في عنوان حق هالبوست وأعتقد أنه شرايكم ينفع لكل قصه من قصصه

...كليلة ودمنة...
في تساؤلات وحيرة وناس ومن ضمنهم بعض صديقات لي ولخواتي يدزون لي إيميل على إيميل المدونة
يستفسرون شسالفة كليلة ودمنة اللي موجودة بالمدونة
بصراحة في بادئ الأمر مافهمت؟!!
بس...لمن رجعت لمدونتي وطليت عليها بديت أضحك
وفهمت شالسالفة
السالفة يا محفوظين السلامة
أنه في من الشخصيات اللي بالمدونة أسمهمـ
"صوت القطوة،،النملة،،كرماري لها صورة فار،،وجنجر صورة دياية"
الموضوع صدفة ما كان متعمد
وإذا بتعرفون شسالفة التسميات ومنو صوت القطوة و صديقاتها تفضلوا هالرابط


..My Name is Khatoon and iam not a terrorist..
يسألوني ليش أخترتي أسم خاتون يعني خلصوا الأسامي ؟!
خاتون لقب لي أمي تناديني فيه من يوم كنت صغيرة لأني كنت أتكلم بالأوامر ولازم يتم التنفيذ
يعني كنت Bossy
وأمي تسمع انه خاتون أسم تركي معناه الملكة
ومأخرا تناقشنا باللقب مع خالتي "أغاثا الكويتية"
وطبعا طلعت المعنى من النت
سيدات الطبقة العالية لدى الترك قديماً هذا اللقب يقابلها بالعربية سيدة من سيدات الطبقة الراقية لزوجات وبنات الملوك

يعني أسم حلو وما راح أنطر الأسامي تخلص علشان أختاره *_^
يعني بالنسبة لأمي= My Princess

...بوسعد شيصير لي؟!...

مدونة بوسعد

أخذوا هاللغز اللي راح يخليكمـ تعرفون شلون أحنا إخوان اقصد شلون نصير لبعض *_^

شلون يصير أحد ما أخوك واهو لا من امك ولا ابوك ؟

تصدقون في ناس وايد ما اعرلافوا الحل إلا بعد فترة !!!

ومن الناس اللي شايفتهم شخصية خارج النت غير بوسعد

طموحة...قيادية طموحة... طموحة مملوحة (أهي ما تعرفني بس انا اعرفها وخذيت معاها كذا مقرر)

شسالفتي ما في وحدة طموحة بالكويت ما اعرفها ...وانتوا تعرفون احد شخصيا من المدونين والمدونات ؟؟؟

أخت بوسعد من أمه وابوه وحدة من شخصيات المدونة تقدرون تعرفونها؟؟؟

على العموم حتى لو عرفتوها ماراح أقول صح ولا غلط*_^

...نوتات زين من زين الزاد...

جاءت في يوم من الأيام زين الزاد وهي تعدنا بمفاجأة

طبعا زين الزاد مولعة بشي أسمة طور ذاتك او التحدي و الفوز

وقروبنا كله من هالطقة ونحب الدورات اللي تتعلق بتطوير الذات

أو الطاقة اي شي ممكن يخلي منه افضل ..فعرضت علينا فكرة وايد حلوة

الفكرة هيــ...أنها يابت لنا نوتات Zain ولكل شهر في نوته على عدد أيامه

قالت لنا لازم ندون كل شي نسويه في كل يوم طبعا بس الاشياء اللي تعتبر إنجاز

مثلا: سويت رياضة..قريت كتاب..كتبت مقال..نزلت بوست..زرت أهلي..تواصلت مع صديقاتي.

وبصراحةوايد ستفدنا وقمت اراقب يومي عدل ... ومن هذا المنبر أقول شكرًا زينونتي حبيبتي لأنج مبدعة.




...زين الزاد والبر...

خلونا نتعلمـ من هالموقف ونتعلم من صاحبة الموقف المذهلة "زين الزاد"
تخبرني زيون تقول:لمن أيي (يأتي) يوم الجمعة و أقرا سورة الكهف ...ولمن اخلص أمي تقولي
زين الزاد قريتي سورة الكهف ... زين الزاد ترد عليها لا يما قاعده أقرأ السور القصار بعد شوي بأبتدي بسورة الكهف
طبعًا انتوا اللحين تتساءلون شنو الغريب وليش جذبت ؟؟؟ ووايد اسئلة تدور في بالكمـ أنا أقولكمـ شنو الغريب
الله يسلمكم والدة زين الزاد ما تقدر تقرا عدل لأنها ما كملت دراستها وبسرعة طلعت من المدرسة وما تعرف تقرا عدل
فزين الزاد ما تحب تحسس أمها أنها أحسن منها أو انها قرأت بسرعة وأن والدتها أقل منها فتفضل لو أنه امها تحس بالتفوق عليها

طبعًا لمن دريت بالقصة وزين الزاد كانت تقولها لي على عجل ولا جنه شي مهم
وكنا في عزيمة وحريم وإزعاج وزحمة وأنا كنت قاعدة يمها وأيرها (أجرها) من هدومها وأمسك أيدها وأحاول
ألف ويها علي وأقولها أنت زيون تسوين جذي ليش تسوين جذي وأهي تجاوب بسرعة وكل شوي أعيد السؤال
وأهي ترد ببساطه وفي بعيونها نظرة إستغراب لي
أنا عيوني غورقت بس أهي ما حست فيني لانها لاهية و الإزعاج مالي المكان
بصراحة كبرت زين الزاد بعيني وصغرت بعين نفسي لأني احيانا أحاول اتبارا مع امي وأستانس أفوز عليها طبعا لاني أحس أمي شي كبير وموسوعة من الكتب و الثقافة ... يمكن هالشي يونس امي لكن زين الزاد سوت شي أنا ما قدرت اسويه
قمة البر في الوالدة ... و مافي عجب التوفيق و حب الناس اللي تمتلكه والنفس الحلوة...أحبج زين.


...الأصنصير الله يستر!!!

مسز نظارة أو مسزز سينس تعرفونها صح

المهم تقول في هذاك اليوم الجميل قررت أني أروح لمكتبة الجامعة بالهندسة و ادرس لي جم كلمة من باب التحضير للامتحانات المهم دخلت المكتبة حاضنة كتبها وعليها جنطتها و مرش باتجاه الأصنصير ما شاء الله جندية علم

المهم توصل تطلب الأصنصير تنطر و إهي تنطر جان تحس في أحد مجبل عليها و إلا شاب معاه كتبه و عليه لحية خفيفة

قالت: اشوه محترم بينطرني أصعد مهو صاعد وياي(=لن يصعد معي) المهم جان ايي يوقف يم الأصنصير بعد

جان تلف جسمها بعيد من الإحراج و فجاة تسمع صوت ضحك خفيف و يتكرر جان تلف ويها شوي طلع اللي قاعد ينطر معاها الاصنصير جان يفتح باب الاصنصير جان يمسكه و يضحك ويقول

الشاب الغريب:الله يستر... ويطالعها

ما تخفيكم الأنسة مس نظارة أمرا كانت بتبطها ضحكة على خبالة الله يستر استح على ويهك و بقلبها هذا المحترم طاح حظه المهم دخل الأصنصير ومسكه وقال لها تفضلي

مسز نظارة بقلبها و اهي فيها تفضلي ياروح أمك (الكلام السابق بالمصري)بعد الله يستر

جان تقول لا ما بي و ظلت تنطر الحمد الله بعد ما نزل لها مرة ثانية علشان تصعد خخخخخخخخخخخخخخخ مسكينه مواقف الاصنصير تعبانه يعني ليش ما نطرها تصعد اهي ياية قبلة و باين عليها من النوع المحترم بس اهو اللي مو محترم ما عليه مسزز نظارة جيل تعبان و انت الكبيرة .


...هدية...

كانت هاذي علبة الهدية اللي تلقيتها من صديقتي صوت القطوة او طموحة
ووايد عجبني طريقة تغليفها على الطبيعة أحلى وصدفة مشت مع داري
كنت بصور لكم الهدية بس تكيسلت وكانت ساعة عجيبة وايد حلوة
مشكورة وايد ذوقج حلو ولج مستقبل في الحرفيات عزيزتي *_^



...مريم نور تصرح :أنتوا بتآكلوا زبالي...


في أحد المرات اللي نزلت فيها مريم نور للكويت وتمت عزيمتها من قبل احد البيوت في الكويت
وطبعا عزيمة يعني أكل و من النوع الزبالة اللي تقول عنه مريم نور في برامجها
وبدت تراقبها اللي وصل لي من خلالها القصة وأهي عند البوفيه
تقول: شاهدت مريم نور و شفتها وياليتني ما شفتها كانت مريم نور
تغرف وتعلف من هالزبالي على قولتها...أستغفر الله نعمة الله...
جان تتقدم منها وتقول لمريم نور
أستاذة هل الاكل هذا اللي تقولين عنه الزبالة ليش تاكلينه
مريم نور:مرة وحده ناكل زبالة ما بي ضر
وااااااااااااااااااااااي شنو هالإنسانة ما تدري انه وايد ناس غيروا الـLife Style والسبب اللي تقوله.
Hey... Missy what R U saying
مستحيل تكونين حارمة نفسج من الأكل فترة طويلة من هالزبالة وتآكلين بهالطريقة لاني من النوع اللي ينسى يآكل
فلمن ارجع اكل شي بسييط حتى لو توست جبن قلاص أرجع على طول وصار بالنسبة لي شي طبيعي لازم أرجع بعدين معدتي تتأقلم
آسفة لوعت جبدكم بس كنت حابة أثبت شي أنها ما رجعت دليل على انها متعودة تآكل من هالزبالة ...اتوقع انها كانت تروج فقط للإيروبك و هالنوع من العلم و الكتب و الدايت واكبر دليل انه الناس لمن قامت تعرفه قللت نشاطها.
BiG Lier
فترة من حياتي كنت اتابعها وقاطعتها لمن قالت لا تكلون لحم
No way ولمن قالت لاتشربون حليب شربوا سباع العيش والصويا وقولوا لنفسكم انه حليب نباتي خخخخخخخخخخخ مينونة هالمرة وأنا مفترسة ... وأنا اقول منين هالمتن.

...طالب=دينار...
العنوان اهو اللي قالته وحدة من الناظرات في أحد المدارس الخاصة هالناظرة من أصل أجنبي (يمكن أمريكية او بريطانية)
كانت تأشر بسبابتها على الطلبة الكويتين بالمدرسة وتقول دينار دينار وأهي تلوي حلجها وتعدهم...حقد عجيب!!!
يعني الطالب الكويتي اهم ما فيه فلوسه واهو مايعنيها...طبعا الأهالي اشتكوا عليها.
...أنبوبة إختبار...

" خالي مساعد"
شخصية يديدة على المدونة راح اتكلم عنها بعدين


بس بشكل موجز: رجل في الستين لم يسبق له الزواج نكته ومثقف حد الدوسه عنده معلومة بكل شي وعن اي شي
حياته اشبه بالنكته.
في جلسة حميمية أسرية كان فيها أم جدتي اللي أهي جدة خالي مساعد ومعهم تجلس زوجة خال

"خالي مساعد" وأختها.. زوجة خاله بإختصار وأختها وهما من أصل عراقي يتميزن بخفة الدم والثقافة

كان بهالمرحلة خالي مساعد في الثلاثينات ومعاهم وأحد ثاني من خوالي
المهمـ ... خالي مساعد يحب يوصف بجمال النساء ويحر المتزوجين ويبين لهم انا فاتتكم في وحده أحلى من اللي خذيتوها

فقام يسولف ويقول...
خالي مساعد:ذاك اليوم وأنا بالسوق جان أشوف ذيج الوحدة الحلوة الوردية قاعدة تشرب بطل ماي

الجدة: أي

خالي مساعد:وإلا تصدقون عاد(لا اكيد ما نصدق) واهي تشرب الماي جان يبن الماي وأهو يمر فبلوعومها (يللا عاد يللا مصختها)

...أوووخ قويــــــة قويـــة ودنا نصدق بس قويــــة...

جان ترد عليه أخت مرت خاله وطبعا اهي من العراقين اللي دمها خفيف وعفوية جدا وقالت له:

ههههه(ضحكت)... هاااي أنبوبة أختبار مساعد مو حورمة
...طبعا ويهه قام يقط الوان وقام يقول لأ اهو مو في الحقيقة أأا ممم (خلاص خالي اسكت ما عندك سالفة...

وطبعا الكل قام يضحك ومسكوها عليه "أنبوبة اختبار" طبعا الغرض يحر خالي اللي قاعد لانه متزوج


وإن شاء الله كنت خفيفة عليكمـ
~دربكمـ خضر~


الشخصيات في هذه المدونة مع الصور *_^

الأربعاء، 15 سبتمبر 2010

!!!الإساءة !!!

~ بسمـ الله الرحمن الرحيمـ ~
~ السلام عليكم ورحمة الله وبركاته ~


مسلسل "يوميات بوقتادة وبونبيل" على قناة الوطن
هذا المسلسل الذي أساء للكويتين قبل أن يسيء للمغرب وقطر
لكن للأسف لم نستفق للإساءات منذ المواسم السابقة يمكن لأنه طبعنا ككويتين
ممكن أن نرضى أن نغلط على بعضنا لكننا لا نرضى بتصدير العيوب

هذا المسلسل قصده أثارة البلبلة والمشاكل والتعدي على الآخرين تحت مسمى الحرية
ولكن بالحقيقة إن ما يقومون به ليس حرية بل قلت أدب وقد تم عرض مشاهد مشينة
لم يكن مهما عرضها لتوضيح القضيه وكان من الممكن أن تكون الرسوم أكثر إحتراما
بالذات وأن عدد كبير من الأطفال يتابعوه ربما لا يفهمون شيئا لكنهم يفهمون أنها رسوم


هذا المسلسل مثلما أساء لدول ليس لها دخل ولم يحترم مشاعرهم و لم يحترم الاخوة التي بين العرب
أساء للكويتيون انفسهم فقد اظهر أن لا أحد من شعبنا يتمتع بالاخلاق و النزاهة
وان الكويتيون ليسوا سوى ليبرالي متحرر أو ارهابي بستايل دين أو رجل يبحث عن المال وآخر من ربع الطرب وأهله
لم يظهر للكويتين صورة جميلة كل المسلسل عبارة عن إمتعاض وأعتراض وسخط
على عكس المقدمة التي وضعوها حيث قالوا "وطنا ونفتخر فيه"
أين الفخر يا ترى ؟؟؟!!!!
يقولون أيضا بالمقدمة "نبي العادات الأصيلة"

يا إلهـــي !!!


إن كانوا صادقين في رغبتهم لتوصيل صورة ،،نشر رسالة ،،أو رغبتهم بعودة التطور،،والعادات الاصيلة،،وفخرهم بالوطن
فقد كان من الواجب عليهم أنــــ...

يعرضوا لنا قدوة "نعمـ قدوة"
فعندما يقول الإعلام أنظروا لليمين فإن الناس ستنظر لليمين
وعندما يقول أنظروا لليسار فإن الناس سينظرون لليسار

عندما عرض سوبرمان وأن الخير ينتصر على الشر أرتدوا الصبية العباءات والشراشف وتسلقوا الخزائن
وكانوا يحاولون أنقاذ بعضهم ولم يكن احد يفضل جانب الشر لانه مهزوم...عندما يشاهد احدنا نحن الكبار فلم مغامرة
تثور فيه روح المغامرة
عندما نزل فيلم يحكي قصة سرقة البنك فإن أمريكا بدات تصرخ "لقد ازدادت عمليات سرقات البنوك"
عندما كان يقدم تلفزيون الكويت "إلى امي وأبي مع التحية" بدأ سن الشباب يحلم ببناء أسر متفهمة
عندما بدأت فترة الصحوة بالكويت ومتلأ تلفزيون الكويت بالخطب والأأمة
ألتزم أغلب الكويتيون والفتيات تركوا البكله(القذلة =الغرة) وتركوا ماني جوب و الميكرو جوب
عندما ظهر فايف جاكسون الكويت ومصر عانت من الكشيش والقفف ومن يذهب للسينما أصبح يحتاج لوسادة مرتفع
ليجلس عليها...لذا شئنا أم أبينا فالإعلام يسير الشارع

كان من المفترض بدل ان يكون هذا المسلسل متذمر ان يعرض قدوة أن يعرض الموظف الذي لا يخون
الذي يحاول ان يعطي دون أن يفكر في الأخذ ..أو يحاول أن يعلم الكويتي كيف يستخدم الحرية وكيف يكون
مواطن صالح ويوعيه لماله وماعليه من حقوق فبعض الحقوق المخفية هي التي سوف تحل الكثير من المشاكل
"والمعنى في بطن الشاعر"*~^
التي يواجهها المجتمع ... بصراحة الناس نست شلون تتصرف بطيبة نست شنو لازم يسون لأنه التلفزيون
ما يعلمهم غير يتذمرون ويعلمهم طالبوا لكن نسى يقولوهم شنوا الواجبات اللي عليهم وبدوا يحلون الشر
وعادي الناس كلها حراميه ونصابة فصار يعرض لهم بس التصرفات السيئة
وما يدرون شلون يكونون زينين لازم يكون الإعلام موجه


لو سمحتوا...عرضوا الأخلاق و القيم و العادات و التقاليد الكويتية الاصيلة عرضوا صورة للمواطن الصالح
طول عمرنا نعرف انه لازم أي مسلسل أو فلم...لازم يكون فيه جانبين خير و شر شالمسلسل إلي ولا شخصية فيه
كفو ومحترمة هالمسلسل بكبرا شر بشر ما شفنا له جانبين شلون تبونا نميز أو إنا نستفيد
ونطلع بقيمة هذا المسلسل عبثي هابط جدا جدا.
هذا رأيي و السلامـ ...و لا ننسى شنوا علمنا دينا الحنيف



يقول الله عز وجل:

(يَا أَيُّهَا الَّذِينَ آمَنُوا لا يَسْخَرْ قَوْمٌ مِّن قَوْمٍ عَسَى أَن يَكُونُوا خَيْرًا مِّنْهُمْ وَلا نِسَاء مِّن نِّسَاء عَسَى أَن يَكُنَّ خَيْرًا مِّنْهُنَّ وَلا تَلْمِزُوا أَنفُسَكُمْ وَلا تَنَابَزُوا بِالأَلْقَابِ بِئْسَ الاِسْمُ الْفُسُوقُ بَعْدَ الإِيمَانِ وَمَن لَّمْ يَتُبْ فَأُولَئِكَ هُمُ الظَّالِمُونَ) (الحجرات: 11)



ولغير الكويتين ترى يا جماعة الخير الكويتين أبدا موبس الشخصيات اللي عرضوها

أحنا ما ننكر وجود هالشخصيات لكنهم مو كل الكويت وكل بلد فيها الطيب و الردي

والكويتين وايد اعترضوا على الكلام و الإستهزاء اللي نقال بحق أخوانهم.

~تحديث~

أحد التعليقات


طموحه يقول...
السلام عليكم

ما اقدر اقول شي بعد الي قلتيه كفيتي و وفيتي و الله
الله يعطيج العافيه

المشكله ان في كل مكان اقعد فيه و ينذكر طاري هالمسلسل الكل يعترض عليه

ابوي بس يشوفه على القناه قلب القناه على طول و يقول هذيل مو كفو يمثلون الكويت

اغلب الكويتين معترضين على هالبرنامج و اكثر من شكوه ضده الغريب ان استمر و لا انقطع

و انا اايدج الراي 100% الاعلام له دور كبير و اغلب البرامج الي تاثر اهي الرسوم المتحركه لان مشاهدينها اكثر خصوصا فئة الاطفال و لا تستخفون فيهم و تقولون ما يعرفون

قامو يسالون لين يشوفون اشياء غريبه عليهم

سلامي مرة سالني عن حلقه اعرضوها مالت ان ولد الارهابي بلع قنبله

فقالي شلون بلع القنبله من وين يت القنبله ؟؟

و لين يشوف اشكالهم الي امثلينه على بونه ارهابين
يقول شنو يعني ؟؟

اقوله مالك شغل هذيله مو زينين

يرد علي عني كلهم مو زينين ؟
بس في مثلهم وايد بالمسجد يعني الي بالمسجد هم مو زينين

و اقعد اعدل المعلومه الي في مخه مده طويله

يعني حطوا طابع ان كل واحد مقصر دشداشته و حاط لحيه ارهابي

و احنا صارلنا دهر بنبين حقيقه الاسلام الصحيحه للغرب

يطلعون ناس من بينا و خربون كل شي و خربطون تفكير اليهال

حسبيى الله و نعم الوكيل

انا وحده حدي منبطه جبدي من هالبرنامج ودي ينتفونه من عرجه

تقبلي تحلطمي


أستودعكمـ الحي القيومـ


الخميس، 9 سبتمبر 2010

عيد فطر سعيد جدًا جدًأ

~*بسم الله الرحمن الرحيم*~
~*السلام عليكم ورحمة الله وبركاته *~
العيد هل هلاله..كل الطرب يحلاله
ياربنا زيد النعم..وحسن جميع الحاله
عيدكمـ مباركـ
وتقبل الله طاعتكمـ

منـ أجملـ مسجات التهنئة بالعيد
اآإدري تهانيكـ بالعيد مليآنهـ ...
بس بأمآنهـ!؟ ..
آحد قآلك: قلبيـ ..~
[اْلعيد إنت عنواْإنهـ] ...!
إن سبقتني
فأنت الكريم إبن الكرام
وإن سبقتك
فمنك تعلمت الاحترام
نحن لا نرسل لمن نعيش معهم..
بل نرسل لمن يصعب علينا العيش بدونهم ..!!
فأسأل الله الذي أهل الهلال و أرسى الجبال أن
يبلغك ماتتمنى وأنت في احسن حال..وان يتقبل طاعتك،،،

العيد هو ،،،
دقت باب ...ولمة أحباب...صوت فرحة ويباب
ويـــوه فرحانه..ويهال يركضون مسوين لوية..وأناقة ولبس يديد
وبيض بلاليط*وحليبة مهيلة*وزلابية*وصب القفشة *قرص عقيلي
و أيام العيادي...أتذكر في يوم كنت أعد عيديتي و إلا اعلن عن المبلغ
فطلع المبلغ اللي يمعته (جمعته) مبلغ كبير بالنسبة لطفلة
فخالتي لمن سمعت المبلغ اللي يمعته
نطت تعد وياي جان تقول لي من صجج
هاتي خل أعد وياج وفجاة قامت تضحك
و طلع بالنهاية انا كنت اعد العيدية من الطرفين
.......
عيدكمـ مباركـ عطونا عيدية
أيامكمـ سعيدة عطونا عيدية
مستانسين عطونا عيدية
وإلا أقولكم خلاص وصلتنا العيدية
*_^